Conditor humani generis, consulens fragilitati nostre, contra inevitabiles casus humanę fragilitatis, multiplicium medicaminum obponere dignatus est precepta. Nam de terrenis et transitoriis mercari precepit cęlestia et sine fine mansura, inquiens: «Thesaurizate vobis thesauros in cęlo, ubi non demolitur tinea vel erugo.» Unde ego Gauzerannus, in Dei nomine, dono Deo et sanctis ejus apostolis Petro et Paulo, ad locum Cluniacum, cui preesse videtur dunnus Odilo venerabilis abba, aliquid de hereditate Maioli avunculi mei, quę mihi jure parentum obvenire debetur, pro remedio et salute animę ejusdem Maioli. Est autem ipsa hereditas quam dono sita in pago Matisconense, in villa Altacurte, scilicet illud totum quod isdem in eadem villa jure hereditario possidere videbatur: Azonem servum cum infantibus suis, et mansum in quo ipse habitat, cum omnibus apenditiis suis; Constantium servum, et mansum in quo ipse habitat, cum omnibus apenditiis suis, pratis, campis, vineis, terris cultis et incultis, et quicquid Maiolus ibidem habere visus est, quesitum, ad inquirendum. Item in villa Cigonio dono servum, nomine Arlannum, cum uxore et infantibus suis, et mansum in quo ipse habitat, cum omnibus apenditiis suis, vineis, pratis, campis, silvis, terris cultis et incultis, totum ad integrum, quesitum et inquirendum. Remitto etiam querelam quam isdem Maiolus habebat de hereditate Sigbaldi presbiteri. Hanc donationem facio, ut Dominus pro sua ineffabili pietate, intercedentibus beata et gloriosa semper virgine Maria, et beatis apostolis simul cum omnibus sanctis, absolvere eum dignetur ab omnibus peccatis et concedere ei gaudia eternę beatitudinis. Si quis vero huic nostrę donationi contradictor estiterit, incurrat iram Dei omnipotentis omniumque sanctorum, et vindicare non valeat quod expetit, sed coactus judiciaria potestate in expensis puplicis auri libras X persolvat. Ut autem nostra donatio firma et inconvulsa perpetualiter maneat, proprię manus tactu subtersignavi testibusque roborandam tradidi. S. Gauzeranni, qui fieri firmareque rogavit. S. Wiberti. S. Gauzeranni alterius. S. tertii Gauzeranni. S. Siguini. S. Rodulfi. S. Rannaldi. Actum Cluniaco, mense januario, Rotberto rege regnante.