Charta qua Bernardus uxorque ejus Lanteldis, et filius eorum Dodo vendunt monasterio Cluniacensi campum in villa Campiloco, Bernardusque et Rainardus peciolam campi in eadem villa dant.
Notum sit omnibus, quod ego Bernardus et uxor mea Lanteldis et filius meus Dodo vendimus monachis Cluniensibus aliquid ex rebus nostris in pago Cabilonensi, in Campiloco villa, in fine Fabriacense: videlicet campum ad Lavarennas vocatur; et terminatur a mane terra
Amandi, a medio die terra Stephani, a sero et a cirtio Sancti Petri. Et accepimus precium quod valuit solidos II; et faciant quod voluerint in omnibus. Actum Campiloco villa. Donant etiam ipse Bernardus et Rainardus in ipsa villa unam peciolam de campo pro animabus patris ac matris eorum, et omnium parentum suorum, terminatam de tribus partibus terra Sancti Petri, de IIII
a parte Sancti Leogdegarii; et faciant quicquid voluerint. S. Bernardi et uxoris ejus Lanteldis et filii ejus Dodonis, qui fieri et firmare rogaverunt. S. Stephani. S. Rainardi. S. Wabonis. S. Domi[ni]ci. S. Rotberti. S. Rotberti. S. Bernardi. S. Rainaldi. Data mense junio, regnante Rotberto rege anno II.