In nomine sancte et individuæ Trinitatis. Otto, Dei gratia Romanorum imperator augustus. Notum sit omnibus fidelibus nostris, quoniam ob petitionem domni Odelonis, venerabilis abbatis, et salutem anime nostræ, per hoc nostrum preceptum confirmamus cuidam cellæ in honore sanctæ Mariæ dicatę, in civitate Papiæ sitæ, ad Cluniacum monasterium dono et traditione Gaidulfi, suorumque heredum pertinenti, quę quondam capella dicebatur Gaidulfi, sed nunc ab omnibus cella dicitur Sancti Maioli, omnes res et proprietates ad eandem cellam intus et foris pertinentes, quas nunc habet vel in futuro Deus ibi concesserit, cum terris cultis, et incultis, aquis, molendinis, piscationibus, omnibusque rebus mobilibus et immobilibus; ea videlicet ratione, ut jam dicta cella habeat, teneat, firmiterque possideat, et semper in ordinatione et dispositione Cluniacensis abbatis, sicut Gaidulfus ordinavit, permaneat. Etiam cum nostra donatione et auctoritate, insuper imperiali jubemus potentia, ut nullus dux, aut archiepiscopus, episcopus, marchio, comes, judex, vicecomes, nullaque imperii nostri magna parvaque persona de predicta cella aut suis pertinentiis intromittere vel aliquid ordinare aut disponere, sine jussione et voluntate abbatis Cluniacensis, presumat. Si quis igitur hoc nostræ stabilitatis preceptum fregerit, componat centum libras auri, medietatem kamerę nostræ et medietatem in Cluniacensi monasterio. Quod ut verius credatur et semper observetur, manu propria roborantes sigillo nostro sigillari precepimus. Signum domni Ottonis (Monogramme) invictissimi imperatoris augusti. Heribertus cancellarius, vice Petri Cumani episcopi, recognovit. Data idus aprilis, anno Dominicę incarnationis DCCCCXCVIIII, indictione XII, anno tercii Ottonis regis XV, imperatoris III. Actum Romę feliciter.