Quisquis catholicorum pia intentione Deo placere appetit, hac ejus mandatis sedulo obsequi, et commissorum suorum pęnitudinem gerere oportet, necesse est ut quandiu in hoc corpore degit, sumopere provideat quod eidem in perpetuum expediat, dumque adhuc vacat et donec hodie cognominatur, dumque tempus acceptabile et dies salutis instare videntur, aurem corporis auditui cordis accomodet, et preveniendo faciem Domini in confessione, quantalibet valet satisfactione enormitatem suorum facinorum bonis operibus expiare studeat; in proximo enim est ut judicium a domo Domini incipiat, et hisdem terribilis adveniens, unicuique prout gessit sive bona seu mala retribuat. Quapropter noverint quicque caractere Christi insigniti, hac in commune sanctę matris æcclesiæ filii, quod ego, ut credo, gratia Christi quę omnes homines vult salvare preventus Gaucerannus, precogitansque futurum Dei judicium, aliquod remedium adinveni animæ meæ, ut in tremendo illo justi judicis examine, non cum impiis dampnari sed pocius cum sanctis et electis merear gaudia æterna adipisci; hac de causa dono largitori omnium Domino Jesu Christo et beatis apostolis Petro et Paulo et Cluniensi cenobio, cui preest domnus hac venerabilis pater Odilo, unam æcclesiam in honore sancti Hyppoliti dicatam, in territorio Matisconensi sitam, cum omnibus ad ipsam æcclesiam aspicientibus, ut ab hodierna die et deinceps quicquid voluerint faciant. Dono ætiam in Montaniaco villa, post meum discessum, vineas quas ibi habeo cum adjacentem sibi terram infra terminibus subjectis constitutam; terminat autem a sero via publica, a medio die terram Sancti Nazarii ... et a cercio terram Sancti Petri. Et si absque liberis qui de fructu ventris mei ex propria et legaliter mihi uxore juncta nati sint, de hac vita excessero, dono omnia mea quę mihi a progenitoribus sive genitoribus vel aliis parentibus meis jure hæreditario obveniunt, tam servis et ancillis cum alodis eorum, quam ætiam in aliis terris, cultis et incultis, in quibuscumque locis vel regionibus positis, totum ad integrum, quesitum et inquirendum. Dono ætiam franchicias et vicarias et omnes consuetudines et comandicias quas mihi parentes mei dimiserunt. Quod si liberi ex meo et legalis uxoris meæ semine progressi, sine legalibus filiis de proprio germine exortis mortui fuerint, hanc donationem Deo et Sancto Petro a me libenter factam, cum omni integritate absque ullius ex meis heredibus vel proheredibus contradictione sive participatione, monachi Clunienses obtineant. Et ita per cuncta succedentia tempora legalibus filiis ex meo semine progressis sibi vicissim recta et legali generationis linea succedentibus, nulli liceat in aliorum heredum vel proheredum nostrorum possessione sive dominatione aliquid horum alienare vel transfundere; sed si ipsi aliquando ita defecerint, ut nullus remaneat, post illius obitum, in quo primum ista defectio venerit, donum istud totum ad integrum, sicut superius tenetur adscriptum, absque ullius contradictione, perveniat ad Deum et ad sanctos apostolos Petrum et Paulum et ad locum Cluniacum, in usus videlicet fratrum Deo inibi servientium. Facio autem hanc donationem non obtentu cujuslibet temporalis comoditatis, sed respectu solius divine propitiationis, ut in die ultimi examinis sit tam mihi quam cunctis parentibus meis, fidelibus quoque atque amicis, simulque omnibus in commune christianis vivis et defunctis remedium salutis ac premium æternæ beatitudinis, et precipue illis qui laudatores et roboratores extiterint hujus nostræ donationis. Si qui vero, quod minime futurum credimus, calumpniatores sive contradictores insurrexerint, notam cum Datan et Abiron et Juda traditore Domini incurrent perpetuæ maledictionis et penam absortus infernalibus tenebris luet æternæ dampnationis. Ut autem hæc donatio firma permaneat, manu propria firmavi testibusque firmandam tradidi. S. Gauceranni, qui hanc donationem fieri firmarique rogavit. S. Achardi. S. Aldeberti. S. Vualterii. S. Jocilini. S. Aidoardi. S. Vuinibaldi. S. Aymoni. De condaminis quas Jocerannus dedit Sancto Petro, decimum quod exiebat de illis Bernardus filius ejus dedit totum Sancto Petro et monachis de Cluniaco, et ipse Bernardus hoc scriptum firmavit et suis hominibus firmare precepit. S. Gausfredi. S. Bernardi. S. Ardradi. S. Tedoini, prepositi. Actum Cluniaco publice, pridiæ idus aprilis, feria IIII, regnante Rodberto rege Francorum.