In nomine sancte et individue Trinitatis. Ego Rodulfus cum uxore mea Odila, dono Domino Deo et sanctis apostolis ejus Petro et Paulo, aliquid de rebus meis, ad locum qui vocatur Cluniacus, pro remedio animarum nostrarum parentumque nostrorum: dimidium mansum quem habemus in villa Croco, in vineis et pratis et silvis, quicquid est in arboribus fructiferis et in omnibus aliis, totum ex integro quicquid ibi habemus ego et filii mei Rotbertus et Bladinus, in silvis, videlicet in silva Arevia et Silvosa, donamus Domino Deo et sanctis ejus, sicut superius dictum est; atque servum, qui vocatur Tetfredus, manentem in ista terra. Et alium mansum ad Avino: ad meridiem terminat terra Sancti Petri, ad septentrionalem terra comitalis, ab oriente terra Sancte Marie et via publica, ab occidente via publica. Ista omnia supranominata totum ex integro donamus et concedimus et tradimus Domino Deo et sanctis apostolis ejus Petro et Paulo, ad locum qui vocatur Cluniacus; tali tenore, ut rectores ejusdem loci teneant, habeant, possideant. Si quis vero aut ex heredibus, aut successoribus nostris aliquam calumpniam inferre temptaverit, ira Dei manifeste super eum descendat, et quod repetit vindicare non valeat; dehinc judiciaria potestate coactus V uncias auri componat. Laudant Aymo, Rodulfus, Rotbertus, Bladinus.