In Dei nomine. Ego Constantius et uxor mea Aldesindis, dono Domino Deo et Sanctæ Marię de Belmont vineam in villa Vetus Molendini, quę terminat de una fronte terra Sanctę Marię, de alia similiter, et de alia terra Sancti Marcelli, de alio latere de ipsa hereditate, et habet in longum perticas XXIII, in una fronte III et dimidiam, de alia perticam et dimidiam. Hanc autem dono pro anima mea et pro sepultura mea, ut quamdiu vixerimus ambo teneamus et possideamus, et si unus ex nobis mortuus fuerit, una medietas ad monacos perveniat et post amborum mortem, totum recipiant; in vestitura omni anno VI sextarios de vino persolvam. Actum Belmont publice. Warnerius monachus scripsit. S. Constancii et uxoris ejus, qui fieri et firmare rogaverunt. S. Constancii, filii ejus, et Grimaldi. S. Adalardi, presbiteri, Teutbaldi et Johannis.