Charta qua Landricus comes sopivit querelam quam habebat Adelaida cum monasterio Cluniacensi pro quibusdam rebus in villa Fontinellulas.
Devotis monachis Cluniacensibus nostrisque fidelibus presentibus et futuris notum fieri volumus, quod ego Landricus, gratia Dei comes, semper obtavi monachos tranquillam vitam habere, et absque impedimento vota sua Deo persolvere die noctuque. Ideoque querelam quandam quam habet quędam nobilis femina, nominę Adelaida, uxor Gotfredi, contra Sanctum Petrum et Cluniacense cenobium, ex terra que est sita in pago Augustudunensi, in villa quę vulgo dicitur Fontinellulas, quam dedit frater ejus Antelmus Sancto Petro, pro salute patris et matris, fratrum et omnium parentum suorum, quam terram ego precio trium librarum redimo; et si quid predicta mulier in eadem terra rectum habere videbatur, inde accipio astipulationem. Hęc vero sepedicta mulier, cum consilio viri sui Gautfredi, dedit
Sancto Petro mansum unum in pago Matisconensi, in villa quę Mons nominatur, pro remedio animę suæ, virique sui, ac filiorum animabus; et ut stipulatio hęc vel donatio firmior habeatur, cartam fieri rogavimus, manuque propria et manibus fidelium nostrorum, manibusque predictę feminę, virique sui firmare fecimus, cum stipulatione subnixa. S. Landrici, comitis, et Rainaldi ejus filii. S. Adeleidis, que hanc donationem fecit. S. Girbaldi, filii ejus. S. Gauzfredi ejus mariti. S. Rotberti filii sui. S. Walterii.