CCE: cartae cluniacenses electronicae
Database of the Charters of the abbey of Cluny (802-1300)

BB 2685     View  [Back]
Charta qua Atto dat monasterio Cluniacensi quidquid habebat in villis Cortilis, Buferias, Misiriaco, Sarciacoque cum nonnullis servis.
Auctor et amator totius nostre salutis considerans humanum genus presentis seculi cupiditatibus et desideriis iniari, celestibus quoque et mansuris terrena et transitoria preferri, dignatus est nos suis sanctis exortationibus convenire, quatinus de rebus temporalibus studeamus æterna et sine fine mansura adquirere. «Thesaurizate, inquiens, vobis thesauros in celo, ubi nec erugo nec tinea demolitur, et ubi fures non furantur nec effodiunt illum.» Quod ego Atto, in Dei nomine, sollicite pensans enormitatemque meorum peccaminum considerans, dono Deo et sanctis ejus apostolis Petro et Paulo, ad locum Cluniacum, cui preest domnus Odilo abbas, totam ex integro hereditatem meam que michi a patre meo Rodberto, jure hereditario venit, meam scilicet partem quam inter fratres meos sortitus sum. Et ipsa hereditas sita in pago Matisconense, in villa Cortilis, quicquid ibi habeo, silvis, pratis, campis, aquis, aquarumque decursibus, exitibus et regressibus, et quicquid ad ipsam hereditatem aspicit. Dono et unum servum, nomine Girardum, cum uxore sua et infantibus suis, et alium servum, nomine Richerium, et uxorem suam, et unum francum, nomine Bernardum, et unum servum, nomine Rodbertum. In villa Bufferias, dono quicquid in ea habeo, meam scilicet partem, et partem Oddonis, fratris mei, quam ipse michi dedit, et unum servum, nomine Natalem, cum uxore sua et infantibus suis; in Monte Sereno, dono quicquid ibi habeo, vircariis, campis, pratis, et in bosco Carnedo meam partem et medietatem partis Ugonis, fratris mei; in villa Misiriaco, dono quicquid ibi habeo, campis, pratis et meam partem de prato Wisiardo; in villa Sarciaco, quicquid in ea habeo, silvis, pratis, campis, vineas. Hec omnia que in ista carta scripta sunt dono Deo et Sancto Petro, totum ex integro, quesitum et inquirendum, et faciant ab hodierna die et deinceps monachi Clunienses de his omnibus quicquid facere voluerint. Facio autem hanc donationem pro remedio anime mee, et in tali conventu, ut quamdiu vixero habeant me monachi cum honore in suam tutelam, et provideant diligenter cuncta michi necessaria in victu et vestitu. Si quis autem hanc nostram donationem calumpniare presumpserit, primitus iram Dei incurrat, deinde Sancte Marie, sanctorumque apostolorum, omniumque simul sanctorum et a consortio omnium fidelium alienatus et excommunicatus, cum Dathan et Abiron, quos vivos terra absorbuit, maledictus permaneat. S. Attonis, qui fieri et firmare rogavit. S. Hylarię, matris ejus. S. Vuinibaldis, fratris ejus. S. Attonis, consanguinei ejus. S. Arlebaldi. S. Martini. S. Undradi. S. Rodulfi presbiteri. S. Gislardi. S. Ranulfi. S. Gontardi. Actum Mazerias publice, nonis marciis, die sabbato. Data per manus Almanni, regnante Rodberto rege, anno XVIII.
(Au dos:) Carta Attonis in Cortilis.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung