Charta qua Gausfredus, Cabilonensis episcopus, confirmat monasterio Cluniacensi donationem ecclesiæ Juliacensis.
Dum ego Gausfredus, sanctę Cabilonensis ecclesię presul, in generali conventu canonicorum residerem, anno Verbi incarnati millesimo XV, nostram adiit presentiam Odilo, venerabilis rector, humiliter obsecrans, ut nostra auctoritate et generali canonicorum assensu, perpetuale scriptum Cluniensi cœnobio et cunctis fratribus presentibus et futuris facerem, ex altare et decimis ecclesię Juliacensi, dantes mutua vicissitudine, pro tantę rei premio, ecclesie Sancti Vincentii quandam ecclesiam jure perpetuo possidendam, quam eis Josfredus Sinemurensis pro remedio animę suę dederat. Jam dicti ergo patris suorumque monachorum petitionibus assensum prebuimus, et scriptum perpetuale fecimus, ut ab hac die, per succedentia secula nullus episcoporum Kavilonensis æcclesię aliquem litem inferat, de quibuslibet rebus ad eandem ecclesiam pertinentibus, salvo matris ęcclesię synodali servicio; adnectens terribile excommunicationis vinculum, ut quicumque hoc firmamentum pontificalis auctoritatis violare temptaverit, iram Omnipotentis incurrat, et ab omnium sequestratus societate fidelium, consorcium habeat in pœnis omnium inmundorum spirituum. Testes Gausfredus presul, Hugo comes et episcopus, Otto comes, Frotgerius decanus, Joslenus, Roclenus, Acardus, Aldo, Rainerius, Ansellus. Gualo scripsit anno XXVI regnante Rotberto rege.