Charta qua Wigo dat monasterio Cluniacensi, filii sui Humberti gratia, clausum vineæ in villa Cociaco.
In nomine summę et individue Trinitatis. Ego Wigo dono Deo et sanctis ejus apostolis Petro et Paulo, ad locum Cluniacum, pro filio meo Humberto, quem trado ad serviendum Deo in jam dicto cęnobio, aliquid de mea hereditate, quę sita est in pago Viennense, in villa Cociaco: hoc est unum clausum de vinea, qui terminat de duabus partibus viis publicis, et de tercia parte terra Sancti Petri, de ipsa hereditate. Faciant autem ab hodierna die et deinceps quicquid facere de utilitate loci voluerint rectores Sancti Petri. Et ut firmum permaneat, manu propria firmavi, testibusque tradidi roborandam.
(Au dos:) Viennensis.