CCE: cartae cluniacenses electronicae
Database of the Charters of the abbey of Cluny (802-1300)

BB 2742     View  [Back]
Charta qua Odilo, abbas Cluniacensis, concedit in precaria comitissæ Agneti potestatem quæ dicitur Lasiacus.
Auctoritate studiosorum et sapientum virorum informamur, ut ea que in [futurum] firmitatis vigorem optinere volumus, ad succedentium notitiam litteris mandare debeamus. Quapropter noverit tam presens quam etiam adveniens fraternitas, quod Agnes comitissa, filia Ottonis cognomento Willelmi, comitis Matiscensis, uxor etiam ejusdem nominis Willelmi, ducis Aquitanorum, adiit presentiam domni abbatis Odilonis, sibique commisse congregationis Cluniensis, humiliter expostulans ut sibi concederent aliquam divisionem ex terra Sancti Petri, quam ad proprios usus possidere et exercere sibi liceret, ea ratione ut quoad vixisset teneret; post suum vero decessum, cum omni integritate in ratione Sancti Petri fratrumque predicti cęnobii rediret. Memor itaque familiaritatis et pie societatis patris ejus Willelmi, domnus pater Odilo et ceteri fratres sibi commissi, insuper ejusdem predicte comitisse quæ hoc exposcebat, diversis et maximis beneficiis sepius dilatati, huic petitioni assensum prebentes, dederunt ei quandam potestatem Sancti Petri que Lasiacus dicitur: ea ratione quam superius prelibavimus, ut quamdiu vixerit teneat; post suum vero discessum, cum omni integritate in causa Sancti Petri et dominatione fratrum redeat. Sapiant vero et presentes et advenientes hoc nullius pecunie vel muneris acceptione factum esse, sed solummodo bona voluntate mutueque familiaritatis et fraternitatis caritate, ut nullus ejus heres vel propinqus inde valeat sibi aliquam occasionem calumpniandi assumere.
(Au dos:) Precarie. Agnes. in Lasiaco, pago Matisconense.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung