Charta qua Aduinus dat monasterio Cluniacensi res suas in villa Clainvillarem.
In nomine Verbi incarnati. Notum sit fidelibus cunctis, quod ego Aduinus, reminiscens enormitatem meorum peccaminum, dono Deo et sanctis ejus apostolis Petro et Paulo et ad locum Cluniacum aliquid de mea ereditate, pro redencione anime patris mei et matris mee, mee eciam anime, et filiorum meorum et omnium parentum meorum,
in villa que vulgo vocatur Clainvillarem, quicquid ibi habere videor, in campis et pratis, mansis et silvis, aquis aquarumque decursibus, totum ad integrum; dono eo tenore, ut omni anno anniversarius agatur pro omnibus antecessoribus meis et misse solempniter celebrentur. Si quis autem hanc donationem calumniare voluerit, iram omnipotentis Dei incurrat, omnibusque maledictionibus subjaceat. S. Aduini, qui hanc donacionem fecit et firmare rogavit. Facta est autem hec donacio aput Portum, feria VI, die festivitatis sancti Maioli.
(Au dos:) Carta Aduini militis, de hoc quod habet in villa Clainvillarem.