Notum sit omnibus fidelibus, quod ego Richardus et uxor mea Josberga donamus aliquid de rebus nostris ad locum qui vocatur Bellomonte, qui est constructus in honore beatę Marię, hoc est raxa una de vinea, quę sita est in pago Cabilonense; jacet autem in clausum qui vocatur Merlo. Donamus autem ad supradictum locum, ut quamdiu vixerimus teneamus et possideamus; et post nostrum discessum, ad locum jam dictum perveniat. Terminatur autem ipsa vinea de uno latere de ipsa hereditate, de alio terra Emilini, de una fronte terra Sanctę Marię, de alia terra Undradi. S. Richardi, qui fieri jussit et firmare rogavit. S. Contardi. S. Achini. S. Undradi. Data per manum Sigbaldi, anno XXVI Rotberti regis.