In nomine sanctę et individue Trinitatis. Ego Arembertus et frater meus Rotbertus donamus aliquid de rebus nostris Domino Deo et Sanctę Marię Bellomontensi, pro remedio animarum nostrarum et parentum nostrorum, ut quamdiu vixerimus teneamus et possideamus; et post nostrum discessum ad supradictum locum perveniant. Hoc est unum curtile in pago Cabilonense, in villa quę dicitur Sancti Anbrosii, in Sevoio vocatur; et omni anno in vestitura quatuor sextarios de vino persolvamus. Terminatur autem de uno latere de ipsa hereditate, de alio terra Bosonis, de una fronte terra Arnulfi, et de alia via publica. Donamus etiam ad supradictum locum, pro sepultura matris nostrę, de campo jornales duos; ut faciant ab hodierna die quęcumque facere voluerint. Terminantur autem ipsi jornales de ambobus lateribus de ipsa hereditate, de una fronte silva, et de alia via publica. Si quis autem hanc donationem contradicere voluerit, non evindicet; sed coactus judiciaria potestate, auri uncias III persolvat. S. Arenberti et fratris ejus Rotberti, qui fieri jusserunt et firmare rogaverunt. S. Arenberti. S. Gislardi. S. Richardi. S. Jodzardi. Data per manus Sigbaldi monachi, anno XXVI Rotberti regis.