Charta qua Rainaldus, comes Nivernensis, consentientibus uxore et filio suo, dat monasterio Cluniacensi curtem Belmontem.
Auctor et largitor totius nostrę salutis perspiciens in labili vitę presentis discursu inevitabiles humane infirmitatis excessus, contra mul
tiformia et lætalia peccatorum vulnera opponere voluit multiplicia et salubria divinorum preceptorum medicamina; videlicet ut et rebus transitoriis ad sustentationem nostrę fragilitatis nobis ab ipso concessis faciamus nobis amicos qui nos recipiant infra gaudia æterne felicitatis. Quod ego Rainaldus, gratia Dei comes, animo perpendens, et enormitatem meorum peccaminum futurumque Dei judicium bonorum ac malorum vehementer perorrescens, et non solum pro me, set etiam pro anima patris mei sollicitus, dono Deo et sanctis ejus apostolis Petro et Paulo, ad locum Cluniacum, aliquid de mea hereditate quę sita est in pago Nevernense. Hæc est curtis quę vulgo vocitatur Belmontis, cum omnibus ad se pertinentibus, videlicet villis, terris cultis et incultis, ædificiis, vineis, pratis, campis, silvis, aquis aquarumque decursibus, exitibus et regressibus; et loco qui vocatur Gerrannis cum omnibus se aspicientibus. Facio autem hanc donationem pro remedio animę meę et anima patris mei Landrici et matris meę Matildis et uxoris meę Advisę, et filiorum meorum et fidelium meorum qui presentes sunt, videlicet fratris mei Widonis, et Rodberti, et Walterii, Gibaldi, Habonis, Iterii, Hugonis, Ricchardi, Girosi et omnium parentum et fidelium meorum, qui presentes sunt et absentes, et hujus meę donationis consiliatores et laudatores. Si quis autem contra hanc donationem calumpniam (quod absit!) inferre presumpserit, primum quidem Dei omnipotentis iram incurrat, hac demum judiciaria potestate convictus, in fisco publico auri libras XX
ti conponat. Hęc vero carta postmodum firma permaneat. S. Rainaldi, comitis et uxoris ejus Advise, hac filii eorum Wilelmi, qui hanc cartam et donationem fecerunt et manibus propriis subterfirmaverunt. S. Walterii. S. Umbaldi. S. Arberti clerici. S. Gibaldi. S. Abonis. S. Iterii. S. Ugonis. S. Richardi. S. Girosi.
(Au dos:) Carte Rainaldi comitis in pago Nevernensis.