In nomine sanctæ et individuæ Trinitatis. Rodulfus, Dei gratia rex. Igitur cum totius ordo religionis, secundum decreta precedentium regum, sanctæ conversationis exordium sumeret, et ad perseverandum in ea, sustentacula alimoniæ his qui districtius atque familiarius in Dei servitio se coercerent, publiga {corr: publica} regalis res ad sufficientiam aliis, et minus aliis subministraret, et ita per ordinem sanctæ Dei ecclesiæ status usque ad presens per longa temporum curricula extensus sit: nihilominus dignum est ut nos, qui quasi per novissimos operarios in vinea Dei laboramus, eosdem operarios in exercitio operis Dei deficere non sinamus; quin potius, ut vires suppetunt nobis, usque ad unguem perducere temptemus. Quapropter sciant omnes presenti tempore decedentes et futuri succedentes, qualiter ego Rodulfus, petente atque exortante dilectissima conjuge mea Irmingarda, dono ex hereditaria mea possessione quoddam prediolum ob animæ meæ ac supermemoratæ conjugis meæ remedium, cenobio Sancti Petri quod dicunt Cluniacum, et abbati ejusdem monasterii et monachis ejus præcepto et sancti Benedicti regulæ modo et deinceps obedientibus et ibidem Deo famulantibus, æcclesiam Sancti Blasii et viculum totum, cum omnibus ibidem pertinentibus, in montibus et planiciis, agris, pratis, pascuis, silvis, decimatione, servis et ancillis, et cum omnibus utensilibus; dono ego et prædicta conjunx mea ad suprascriptum monasterium, ut si nos minus idonee injunctum a Deo peregimus officium, delicti nostri et negligentiæ non pro merito recipiamus dispendium, sed per eorum orationes quos sustentamus subministrantes temporalia, ad stadium currentes remuneremur mercede perpetua. Hæc ut a nobis facta credantur et a posteris nostris non infringantur manu nostra roboravimus et sigillari jussimus. Signum Rodulfi regis piissimi. (Monogramme) Albker indignus presbiter, jussu regis scripsit hæc. Acta sunt hæc in villa Tabernis, quam alio nomine propter fluvium ibidem defluentem, Urba appellant. Data XVIIII kal. febr. anno ab incarnatione Domini MXXVIIII, regnante Rodolfo rege anno regni sui XXXV.