Dum in hujus labentis seculi palestra decertatur, summo conamine procurandum est ut de terrenis et transitoriis humane sustentationi a Deo collatis, cælistia ac sine fine mansura adquirantur; divina voce protestante et dicente: «Thesaurizate vobis thesauros in celo, ubi nec erugo nec tinea consumit.» Quod ego Eldradus presbiter, mente pertractans, ac de rebus usibus propriis mihi a Deo concessis eterna mercari desiderans, dono Deo et sanctis ejus apostolis Petro et Paulo [ad locum Cluniacum], partem hereditatis mee que est sita in pago Matisconensi, in agro Galoniacense, in villa Castello, hoc est unum campum ad Fontem Leonis vocat; de duabus partibus terminat terra Arlebaldi, de aliis duabus terra de ipsa hereditate; habet in longum XXXII perticas et VIIII in latum. Et in alio loco dono unum campum in Mairiaco vocat, qui terminat de tribus partibus via publica et de quarta parte de ipsa hereditate. Hec dono in presenti. Cetera que sequuntur dono post obitum meum: scilicet in villa Bierias duos campos, quorum unus terminat a mane de ipsa hereditate, a medio die terra Tetelmi, a sero terra Bernardi, a cercio terra Sancti Petri; alius campus terminat a mane Sancti Petri, a medio die terra Duranni, a sero terra Adalgeri, a cercio semita. In villa Bugdono dono unam vineam, que terminat a mane terra Eldradi, a medio die et a sero terra Becelini, a cercio pascua. [Dono et in ipso loco unum pratum terminatum a mane terra Sancti Petri, a meridie et a cercio Vuichardi, a sero Heldradi.] Hec omnia dono pro remedio anime mee et anime Osanne sanctimonialis. Si quis autem hanc nostram calumniare presumpserit donationis cartam, iram Dei primitus incurrat, deinde sanctorum apostolorum offensam. Carta autem ista stabilis maneat et firma. S. Heldradi [presbiteri], qui hanc donationem fecit. S. Tetelmi presbiteri. S. Alerici. S. Arnaldi. S. Girberti. S. Pontii. S. Adalberti. S. Duranni. S. Ingelberti.