Dominus Jesus Christus virginum sponsus et Virginis filius, ut notum est angelis et hominibus, mundo et omnibus seculis, copulavit sibi virginem sponsam, non habentem maculam neque rugam, ecclesiam videlicet sanctam, toto orbe diffusam, quam ut sibi placeret ditavit et dotavit cælestibus donis, et ornavit gemmis spiritalibus; in qua divina et cælesti copulatione gaudet humilis castitas, gratulatur cælebs integritas et omnium virtutum regina regnat et gloriatur sotia et soror angelorum virginitas. De cujus contubernio, non ad mortem, sed potius ei procreantur filii et nascuntur ad vitam; ad cujus exemplum, in quantum potest humana fragilitas, sequi et imitari debet fidelium christianorum devotio, ut valeat placere creatori suo. Quod nunquam melius potest fieri, quam cum honoratur et augmentatur honor et decus æcclesię Dei. Ea auctoritate ammonitus, quidam Dei famulus, nomine Leodegarius, Cluniensis monasterii frater et monachus, in villa quę vocatur Sarrianis, quam Wilelmus, quondam dux Provintiæ et pater patrię, sanctorum apostolorum Petri et Pauli et monasterio Cluniensi et loco in quo se sepeliri rogavit, et beato Maiolo adhuc in carne vivente et vivens delegavit et moriens donando attribuit, æcclesiam construere studuit, et eam consecrare et dedicare rogavit a domno et venerabili Regimbaldo, Arelatensium archyepiscopo, ad honorem Dei et memoriam dominicę et victoriosissimę crucis ac Domini genitricis et sanctorum apostolorum Petri et Pauli et beati Marcelli pape et martiris et beati Saturnini martiris incliti et omnium sanctorum viventium et regnantium cum capite suo Christo per omnia secula seculorum. Donat etiam supradictus frater supradictae æcclesię, die consecrationis suę, mansum unum ad sustentationem et utilitatem per succedentia tempora inibi Deo servientium. Valeant cuncti fideles hujus nostre operationis laudatores.