Ego, in Dei nomine, Bernardus volo scire omnes heredes juris nostri et possessionis nostræ et cives omnes presentes et supervenientes hujus patriæ, intulisse me injustam calumpniam Cluniensibus fratribus pro quibusdam rebus et terris meæ vicinitati adjacentibus, et modo penitet me aliquid eis contrarietatis et in his et in aliis causis fecisse; et ideo desiderans ab eis indulgentiam et remissionem de inlatis a me sibi injuriis accipere, sub sollempni renunciatione, et ut ita dicam vuerpitione, in presentia domni mei et karissimi senioris Hugonis episcopi et nepotis sui comitis Tethbaldi, reddo et relinquo omnes malas consuetudines et injustas quas requirebam in ecclesia Sancti Gangulfi et in atrio et in cimiterio ipsius ecclesiæ; promitto etiam et constituo ut, si iste qui nunc est presbiter in illo loco aut aliquis qui post eum officium presbiteratus ibi habuerit, si voluerit contra supradictos fratres aliquid contrarietatis agere vel servitium quod habet et ab ipso loco debent habere, nullum apud me neque apud heredes meos abeant refugium et defensionem contra voluntatem supradictorum Cluniensium monachorum. Mansos etiam duos quos socrus mea Adheleyda dedit Sancto Petro, qui sunt siti unus in villa Nogerols et alius in villa Cabannas, et alios duos mansos quos tenet Durannus, qui sunt siti in villa Sancti Gangulfi, si in illis aliquid rectitudinis habeo, totum Deo et Sancto Petro dono et transfundo; et si injustæ retinere presumpsi, penitentiam agens reddo, relinquo et publicam vuerpitionem facio, sub tali conditione et contestatione, ut nullus heredum nostrorum de his supradictis causis injuriam et calumpniam supradictis fratribus inferre presumat; et si aliquis eorum agere contra nostram istam institutionem temptaverit, nisi cito resipuerit et congrua satisfactione emendaverit, sciat se mundanis legibus obnoxium et celesti propitiatione indignum. Ego vero hanc convenientiam non pro his tantum causis de quibus modo tractamus, cum predictis monachis facio, sed ut dilectio et bonivolentia quam inter se dudum habuerunt nostri parentes et Cluniensi monasterii patres et fratres firma et incorrupta permaneat, ita ut supradicti seniores nos et successores nostros, ut fideles amicos et vicinos, diligant; et illi ex nostra parte quamdiu vixerimus fidelitatem et amicitiam habeant, et cum mortui fuerimus, animas nostras Deo commendent et corpora nostra sepulturæ tradant, salvo cumdigno hujuscemodi obsequii benefitio. Et ut hæc descriptio firmum tenorem obtineat, manu propria confirmo et corroboro; et ut aliis quibuslibet ad confirmandum presentetur volo et ammoneo. S. Bernardi, qui fieri et firmare rogavit. S. Emme, uxoris ejus. S. Heymonis. S. Eldebranni. S. Rotfredi. S. Leotbaldi.