Dum in hujus pretereuntis vitę mutabilitate unicuique mortalium conceditur vivere, quia nec momentum unius horę, absque aliqua peccati macula valet percurrere, sollicitus id operetur, id expetat, quod sibi in futurum proficere valeat; etenim quia transeuntis ęvi tempus ad instar torrentis pretereundo deficit et deficiendo evanescit, illud diuturnitatis et longevitatis tempus omnimodis adquirendum est, quod inmutabiliter manet et manendo indeficiens perseverat. Ad hujus veri temporis et beatę vitę premium, nullum aliud verius quam elemosinę introducit vestigium. Hortatur nos ad hęc per se ipsam Veritas, dicens: «Facite vobis amicos de Mammona iniquitatis, ut cum defeceritis, recipiant vos in ęterna tabernacula». Hoc itaque sollicite perpendens et diligenter considerans, ego Hyldinus nomine, pondusque proprię infirmitatis et peccatorum pertimescens, jam jamque finem vitę instare non ignorans, facio hanc presentem donationem pro redemptione animę meę omniumque parentorum meorum, Deo proprio conditori et redemptori, sanctisque ejus apostolis Petro et Paulo et Cluniensi monasterio in eorum honore consecrato, cui preest domnus abba Odilo, de quadam terra mei juris et proprietatis quę sita est in pago Maticensi, in agro Alaliacensi, et in villa que vulgo dicitur a Jocs, et in confinio Cluniacensi determinatur. Sunt vero ipsius terrę hę determinationes: a mane terminationem habet de ipsa hereditate, a sero et a circio terra Sancti Petri. Infra has itaque determinationes quicquid videor habere tam in silvis quam in campis, mansionibus et curtilis, totum ad integrum confero Deo et predicto monasterio, ut ab hodierna die et deinceps in usus monachorum inibi degentium absque ullius contradictione in perpetuum deveniat. Si vero ego, aut aliquis de heredibus meis, vel ulla alia opposita persona huic testamento calumniam inferre temptaverit, iram Dei omnipotentis sanctorumque ejus incurrat, et convictus judiciaria potestate, quod repetit non solum vendicare non valeat, verum etiam legibus mundanis subjaceat et auri libram unam persolvat; atque hęc carta firmum postmodum vigorem in perpetuum obtineat. Ut autem magis magisque roboretur, manu subterfirmavi testibusque roborandam tradidi. S. Hyldini, qui fieri et firmare rogavit. S. Walterii, Widonis, Hildini, Humberti, Hugonis, Wigonis, filiorum ejus. Facio etiam cum hac presenti donatione perdonationem de illa consuetudine quam mihi faciebant homines Sancti Petri pro pastura qua utebantur in terra de qua presens donatio fit. S. Attonis, Tetberti, Tetbaudi. Actum Berziaci publice, anno V Heinrici regis Francorum. Frater Jozaldus ad vicem cancellarii rogatus scripsit.