Legalibus atque antiquissimis instituimur documentis, ut si quis per succedentia tempora aliquid ęternaliter vult confirmari, teli testamento se debet muniri ne ullarum incursione personarum in posterum aliquid valeat impugnari. Quamobrem, auxiliante in perpetuum Domino nostro Jesu Christo, ego Sigibodus scire volo omnibus ęcclesie filiis, tam presentibus quam futuris, qualiter ego cum conjuge mea, nomine Woudtona adhuc illa vivente, donationem fecimus Sancto Petro, loco Cluniacensi, ęcclesiam quę est constructa in honore beatissimę Dei genitricis Marię, et est sita in pago Genevense, in loco qui dicitur Silingiacus, cum omnibus dotis et decimationibus ad ipsam ęcclesiam pertinentibus. Dedimus etiam ibi mansum unum de terra in ipsa villa Silingiaco jacentem cum casale et vinea et prato et silva, et quicquid ad ipsum mansum pertinet usque ad exquisitum. Hanc autem donationem fecimus per manum domni Odilonis, supradicti loci abbatis, viri famosissimę sanctitatis, qui tunc presens affuit. Hanc autem donationem nepotes nostri Letto et Sigibodus in tantum confirmaverunt, ut etiam ipsi postea aliam donationem facerent, et monachis predicti abbatis traderent, et per funem signi ęcclesiae eosdem monacos revestirent, insuper et vuirpitionem illis facerent. Hanc autem donationem idcirco fecimus, ut remedium sit animabus nostris et nostra societas sit in benefactis supradicti loci Cluniacensis, et monachi quos ad habitandum ibi delegaverint habeant semper memoriam nostri seu parentorum nostrorum et maxime illorum qui de benefactis suis hoc agere studuerint, ut locus ille crescat et amplificetur et cultus Dei ab inibi Deo famulantibus sine querela et murmurio adimpleri valeatur. Quod si postea aliquis malignus aliquo tempore istam cartam in aliquid perturbare voluerit, sciat se non solum in hoc seculo nihil proficere, sed etiam in futuro a Deo et a Sancto Petro dampnandum se esse; et ut hæc carta firma et stabilis in ævum permaneat, stipulatione subnixa. S. Sigibodi, qui istam donationem cum sua conjuge et cum suis nepotibus Leutone et Sigibodo fecit et firmare rogavit. S. Bruchardi testis. S. Constantini testis. S. Odolardi testis. Ego frater Girardus, presbiter et monachus, istam cartam rogatus scripsi, anno ab incarnatione Domini nostri Jesu Christi millesimo XXX. VIIII, indictione VII, regnante Heinrico rege, filium Cunonis imperatoris, anno primo.