A paradisi amenitate primo parente nostro expulso, in hujus vite peregrinacione ob inobedientię culpam constituto, omnipotens Dominus ut sicut exinde ejectus fuerat, speciale ei tribuit quoddam remedium, per quod valeat ad æternum redire unde exierat regnum; dat namque unicuique fidelium speciale peculium, quatinus de conlatis ab eo sibi bonorum temporalium faciat sibi thesaurum indeficientem in celum, quo non ingreditur fur ad furandum, nec ubi nulla est demolitio tinearum, sed et sapientis et justi viri exortantis est vox in qua invitamur ad helemosinę tribuendum bonum, qualiter nos invitat, dicens in hunc modum: «Fiducia magna est coram altissimo Deo, eis qui sectati fuerint helemosinę bonum.» Quapropter ego in Dei nomine Rainaldus, cum uxore mea Terredę nomine, donamus Deo et sanctis ejus apostolis Petro et Paulo, ad locum Cluniacum, ubi prodesse magis quam preesse videtur domnus et reverentissimus Odilo abbas, ex nostrarum temporalium rerum a parentibus nostris jure obvenientium, videlicet dimidiam ecclesiam in territurio Augustudunensi sitam atque in honore sancti martyris Christi Andochii consecratam, cum omnibus que ad medietatem ipsius ecclesię pertinere noscuntur. In ipsa etiam villa, ubi eadem ecclesia constructa est, que Fontaneda vocatur, dono supradicto loco servientibus Christo, unum mansum cum omnibus que ad se pertinent, quesitum et inquirendum. Hanc autem donationem ex rebus supra denominatis facio pro anime meę remedio, necnon et pro anima uxoris meę Terredę et pro animabus omnium parentorum meorum salute, quatinus omnipotens Dominus, qui salus fidelium et helectorum suorum est, cum sanctis suis concedat nos gaudere in suo regno; in tali etiam convenientia hec ipsa facio, ut ab hodierno die et deincebs habitatores Cluniacenses ex his quicquid voluerint agant. Quod si quis huic nostræ donationi contrarius esse voluerit vel calumniam inferre temptaverit, omnium maledictionum que in divinis litteris continentur maledictione punitus, anatemate perpetuo damnatus intereat. S. Rainaldi et uxoris ejus Terrede, qui hanc donationem fecerunt. S. Landrici. S. Tedrici. S. Rolanni. S. Ansegisi.