In nomine Domini Dei et Salvatoris nostri Jesu Christi. Ego Girardus, miles, notum esse volo cunctis præsentibus et futuris, quod proclamantibus se monachis Cluniacensibus, videlicet Almanno, decano claustrensi, et Rodberto, priore Cariloci, cum coessentibus sibi fratribus, ante præsentiam domni Odulrici, Lugdunensis archiepiscopi, et quamplurimorum nobilium clericorum ac laicorum regionis, vuerpitionem feci super altare Sancti Stephani, de omnibus aliis consuetudinibus et executionibus quas exigere solebam, quas pater meus non habuit, sed ego allevavi, non solum infra munitionem salvamenti monasterii, verum etiam in circumjacentibus terris et villis ad præfatum locum pertinentibus, etc., ut ab hac die et deinceps, neque ego, neque alius pro me, exigam qualicumque occasione omnibus diebus vitæ meæ; sed neque post mortem meam aliquis ex hæredibus meis ullam rationem habeat requirendi. Quod si quis hoc præsumpserit, iram Dei, etc. incurrat, præsentis quoque domni archiepiscopi Odulrici anathematizatione colligatus fiat, etc.; et in fisco publico auri libram componat. Signum Girardi, qui hanc vuerpitionem feci. Testes sunt vuerpitionis domnus Odolricus archiepiscopus, domnus Surannus decanus, frater ejus Rollannus (et viginti quinque alii, quorum nomina præterimus).