Sollertissimę prelati sanctę Dei æcclesiæ procurare debent ut omnia sibi a Domino credita ita constituant ne proruant, et quę viderint depravata, juvante Domino, prout potuerint in melius restituant. Quapropter ego, in Dei nomine, Hugo, Nivernensium humilis presul, cernens quandam abbatiam in honore Domini nostri Salvatoris rite fundatam sanctoque Cyrico delegatam, priscis temporibus monasticę hordinis decoratam, sed nostrorum predecessorum incuria valde depravatam, atque regulam almi confessoris Christi Benedicti pæne foris eliminatam, cupiens in pristinum restituere gradum, cum consilio Adalelmi, ejusdem rectoris loci, cæterorumque clericorum et omnium fidelium nostrorum, tradimus Deo et sanctis apostolis ejus Petro et Paulo, et loco Cluniaco, cui preest domnus Odilo abbas, suisque successoribus, ob requiem animarum nostrarum et antecessorum et successorum nostrorum, hunc locum sublimatum, quatenus eorum frequentia precum omnes mereamur asscribi in libro vivencium, cum appendiciis et adjacentiis et sibi coherentiis, adquisitis scilicet et adquirendis, ut ab hodierna die et deinceps predicti rectores loci teneant et possideant, et quomodo melius eis secundum regulam Sancti Benedicti visum fuerit, absque alicujus contradictione et calumpnia disponant, manus nostras a cecitatis munere excucientibus, successores vero et posteros nostros propter Deum et pro Deo obtestamur, ut hoc testamentum a nobis conscriptum inviolatum conservent, ne quandoque cavillancium vigente versucia in reliquum fiet irritum; ut autem hoc privilegium a nobis editum in posterum maneat inconvulsum, manu propria firmantes, clericis et laicis confirmandum tradidimus. Hugo, Nivernensis æcclesię episcopus, huic testamento subscripsi. Actum civitate Nivernis publice in sancta synodo, anno Dominice incarnacionis millesimo quadragesimo quinto, indicione undecima, regnante Heinrico rege Francorum. S. Hugo episcopus, Adalelmus, Gosfridus decanus, Malguinus archidiaconus, Gosfridus thesaurarius, Hugo prepositus, Rannulfus presbiter, Landricus, Engelbertus, Ildebertus, Bernardus, Rannulfus, Rodulfus, Rotbertus, Roclenus, Raginardus, et alii quamplurimi. Odo preceptor atque cancellarius scripsit octavo idus novembris.