Domno Hugoni abbati Cluniacensi, Rotgerius, comes de Foys, et uxor ejus, amici, et omnino servi pro posse sui, a salvatore Deo salutem et opem. Notum est nobis, pater et magister animarumque pastor, teste humano genere passim cotidie obeunte, non nos semper corporaliter vivere posse. Ideo consilio inito inter nos ad remedium et nostrarum salutem animarum, remissionemque quę egimus peccatorum, ex hereditate, quam in presentiarum possidere videmur, transitoria, dare vobis partem jam disposuimus, ut perpetuam mereamur cum Domino mercedem, qua post corporum finem nostrorum in cęlesti feliciter vivamus requię. Quod quoque vestri ordinis meritis et precibus credimus adquirere superabundanter, quam petimus Christi misericordię affluentia desuper nobis pie lapsura, cui in nobis vos fidutialiter cum predicta donatione commitemus; verbi gratia, Domino Deo creatori, ac Redemptori nostro Jesu Christo, genitricique ipsius sanctę Virgini Marię et apostolis sanctis Cluniacensis cœnobii Petro et Paulo, necnon tibi, Hugo, sancte viventi, famosissimo per orbem Cluniensi abbati, ego R. et conjux mea, pro acquisitione vitę ęternę concedimus, cum omnibus ad se pertinentibus, cum assensu et ultroneo consilio comitis Tolosani, locum Sancti Antonini, qui vulgo vocitatur Fredoleiz, quatenus ibi monastici habitus, te statuente, regularis inseratur ordo, ad provectum profectumque nostrarum omniumque fidelium animarum.