CCE: cartae cluniacenses electronicae
Database of the Charters of the abbey of Cluny (802-1300)

BB 3052     View  [Back]
Charta qua Willelmus et uxor ejus Adeleida dant monasterio Cluniacensi terram Caverossam in pago Limagniæ.
Cum divinę nobis scripturę per Salomonem testetur auctoritas: «Divicię viri redemptio animę, ejus», itemque idem ipse asserat: «Protegit sapientia, protegit et pecunia»; denique per se Salvator noster saluberrima nos doctrina instituat: «Facite vobis amicos de Mamona iniquitatis»; omnibus quos aut divicię amplificant aut pecunię locupletant, sollerti diligentia providendum est, quatinus ita distribuantur ut in salutem animę proficiant, et quę possessores suos sęqui morientes non possunt, in actoris obsequium expensa pręmittantur. Magna siquidem est hęc conditoris clementiam, cum se pro nobis ipse tradiderit ut redimeremur, nostra non dedignantis suscipere, ut peccatorum veniam consequamur. Has divinę admonitionis sententias considerantes, ego Wilelmus et uxor mea Adeleida, ob remedium animarum nostrarum et antecessorum nostrorum, de amplitudine preditorum quę dedit nobis Deus, beatis apostolis ejus Petro et Paulo, ad monasterium Cluniacense, cui venerabilis abba Hugo preesse videtur, donare aliquid statuimus in pago Limagnię, terram scilicet nomine Caverossum cum continentia sua et finibus suis; ea ratione, ut jus alodiare et quicquid proprietatis aut dominicaturę in ea possideo, predicto loco et monachis inibi Deo famulantibus, delegem et transfundam perpetualiter obtinendum. Et ut hęc traditionis carta firma et inviolabilis permaneat, nostra auctoritate roboravimus, fidelium nostrorum assensu laudari et astipulari fecimus. S. Wilelmi filii ejus. S. Stephani, fratris ejus.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung