Quisquis cupit heres effici illius terrę de qua dicit Psalmista: «Credo videre bona Domini in terra viventium», istam terram quam pedibus calcamus et quam vermes hereditant, pro illa dare non pigritetur, ut expiatus ab omni labe peccatorum, illam Domini vocem quam Dominus in die judicii dicturus est audiat: «Venite, benedicti patris mei, possidete preparatum vobis regnum ab initio seculi». Quapropter notum sit cunctis fidelibus, quod ego Stephanus et fratres mei [Fulcherius et Julinus] donamus Deo et sanctis apostolis ejus Petro et Paulo, ad locum Cluniensem, ubi donnus Hugo abba magis prodesse quam preesse videtur, pro animabus nostris vel omnium parentum nostrorum, hoc est octavam partem ęcclesię sancti Johannis quę vocatur Dunziaco, cum omnibus quę ad ipsam pertinent vel pertinere videntur, in cimiterio, offerendis, decimis, et primitiis sive terra ubicumque fuerit inventa, insuper tres pedas in ipsa villa. Dono etiam juxta villam unum campum. S. Rotberti. S. Hunberti. S. Fulcherii. S. Juliani. S. Stephani. S. Rotbaldi. S. Rotlanni presbiteri. S. Gausmari presbiteri. S. Bernardi.