Noverint fideles Christi presentes et futuri, quod nos duo fratres Arnulfus et Albuinus factum habemus de ecclesia Sanctæ Mariæ quę est posita in episcopatu Arvernensi et prope Castellum. Quam cum domnus Dalmatius voluisset donare sancto Petro et monasterio Cluniacensi, nos pro peccatis nostris diu contradiximus nec consentire voluimus, ut suam bonam voluntatem posset adimplere. Tandem aliquando cognoscentes aliter nos egisse quam expediret ad nostrarum salutem animarum, donationem ejus laudamus et confirmanus, et guirpimus omnem querelam quam habebamus de eadem æcclesia, ita ut nichil omnino ultra queramus nec amplius nos ullo modo intromittamus vel de capellano vel baptisterio vel sepultura ejus. Et preterea cum quidam homines de decima ad ipsam æcclesiam pertinente per manum nostram sint beneficiati, si quis illorum partem suam sancto Petro et prefato monasterio donare voluerit, hoc etiam nos laudamus et simul cum ipso donamus jure perpetuo tenendum et possidendum. Quod nimirum non pro alia reconpensatione facimus, nisi ut prosit in presencia Christi animabus parentum nostrorum et nos ipsi remissionem peccatorum nostrorum per ipsius misericordiam et per beati Petri intercessionem consequamur. Amen.