Notum sit cunctis christianis fidelibus, quod ego Hugo et uxor mea Adda donamus Deo et sanctis ejus apostolis Petro et Paulo, ad locum Cluniacum, de nostra hereditate, sita in pago Matisconensi, in villa Saciaco, hoc est vineam unam quam ad Britonescam vocant, et aliam ad Jenuas sitam. Terminatur una a sero terra Joceranni, a mane terra Aidoardi; alia terminatur a sero terra Sancti Petri, a mane similiter. In alio etiam loco unum campum quem vocant ad Montem. S. Hugonis et uxoris ejus Addę, qui hanc donationem fecerunt. S. Achardi. S. Ansedei et uxoris ejus Bertę. S. Girardi. Item alterius Girardi.