Notitia donationis ecclesiæ Sancti Johannis in villa Alosio a Petro de castro Mauritania, seu fratre ejus Oliverio, monachis Cluniacensibus factæ.
Miles quidam Petrus de castro Mauritania habuerat in voto sanctos apostolos Petrum et Paulum in Cluniacensi cœnobio visitare et de suis donis honorare. Sed quia in itinere romano obiit, quod per se non potuit, per fratrem suum Oliverium implevit. Nam eum illuc direxit cum duobus suis militibus, Arberto et Josfredo, qui vice illius dederunt Deo et sanctis apostolis et senioribus predicti cenobii, æcclesiam unam Sancti Johannis, in episcopatu Pictavensi, in villa Alosio, et unum molinum, et septem arpenta de vinea, et quinque de prato et tantum de bona terra quod sufficiat octo bobus ad colendum.