Charta qua Bernardus vocatus Senex, Cluniensis miles, dat monasterio Cluniacensi mansum ad paludem juxta ecclesiam de Buciaco.
Notum sit omnibus hominibus, tam futuris quam presentibus, quod ego Bernardus Cluniensis miles, qui Senex vocor, veniens ad extremum mortis diem, non inmemor peccatorum multitudinis meorum, pro remedio animę meę et in loco sepulturę, dono Deo et sanctis apostolis Petro et Paulo, in loco Cluniaco, ubi donnus Hugo abba magis prodesse quam preesse videtur, unum mansum qui cognominatur ad Paludem, juxta ecclesiam de Buciaco, cum omnibus ad ipsum mansum pertinentibus, videlicet campis, vineis, silvis, aquis, pratis, terris cultis et incultis. Si quis hanc donationem nostram infringere voluerit, nisi ad emendationem venerit, anathema sit. S. Bernardi, qui fieri et firmare rogavit. S. uxoris ejus Avę. S. filiorum ejus Joceranni et Oudulrici. S. Umberti, prepositi de Cluniaco. S. Gausfredi fratris ejus, prepositi de Masilias.