Charta qua Walterius et Eldeburgis vendunt monasterio Cluniacensi duos campos vineamque in villa Montelio.
Cum inter homines de qualibet re conventio sive venditio aut donatio seu commutatio fit, posterorum memorię intimandum est stilo, ut valeat ratum et inconvulsum perhenniter permanere. Ideo omnibus Christi caractere insignitis clareat, quod Vualterius et Eldeburgis monachis Cluniacensis cœnobii quędam rerum suarum in villa cui Montellio dicitur, scilicet vineam unam et campos duos vendiderunt, accipientes inde IIII solidos et X denarios. Vinea nempe in longo perticas VIII videtur habere, in lato IIII. Sed campus unus perticas XII habet in longum et quinque in transversum, alter autem VI pedes in latum, et XL perticas in longum.