Dum adhuc in hoc corpore sumus et in hac misera vita conversamur, totis viribus nobis est elaborandum quatinus de collatis ac concessis divinitus bonis temporalibus satagemus adquirere nobis amicos et advocatos, ut pro transitoriis et quandoque perituris rebus post depositionem hujus corporis ab ipsis mereamur recipi in ęternis mansionibus. Sic enim Deus et Dominus noster in quodam sui sancti Evangelii nos ammonere dignatus est ita dicens: «Facite vobis amicos de Mammona iniquitatis, ut cum defeceritis recipiant vos in ęterna tabernacula.» Quapropter ego Gausmarus de Perciaco et uxor mea Litgardis nomine, donamus Deo et sanctis apostolis ejus Petro et Paulo ad locum Cluniacum aliquid ex hereditate nostra, videlicet ęcclesiam quę est sita in pago Matisconense, nomine Juliaco, cum omnibus quę ad altare pertinent, videlicet baptisterium, sepulturam et decimam. Hoc autem totum donamus Deo et sanctis apostolis supradictis pro remedio animarum nostrarum et omnium amicorum nostrorum in loco Cluniaco, cui preest donnus Hugo abbas. Igitur nepotes illius dominę, videlicet Ugo et Durannus, similiter quicquid visi sunt habere dederunt ad ipsum locum Cluniacum, tali tenore, ut si aliquis surrexerit calumpniam faciens super his rebus monachis supradicti loci, ipsi fratres duo sint eis in adjutorium et in testimonium in omnibus locis. S. Aymonis Judicis. S. Renchonis de Caatzo. S. Gausmari et uxoris Litgardis ac nepotum ejus, Ugonis et Duranni, qui hanc cartam suis manibus firmaverunt. Signum Artaldi, qui quantum visus est habere dedit Sancto Petro. Est autem ipsa ęcclesia dicata in honore beati Petri principis apostolorum.