Sicut indubitanter fides fidelium credit et Salomon testatur: «Redemptio animę viri sunt proprie divitię, si eas recte et fideliter dispensaverit.» Quapropter ego Adda femina, ut Deus mei misereatur, dono aliquid de hereditate mea Deo et sancto Petro ad locum Cluniacum, hoc est unum campum in parrochia de Maciaco; terminatur ipse campus a mane via publica, a meridie similiter via publica, ab alia parte terra Sancti Petri. Dono etiam unum pratum juxta rivulum qui vocatur Elna. Hoc autem donum facio pro remedio anime meę et filii mei Letaldi, qui hoc donum laudavit et hanc cartam fieri jusit.