In nomine cunctipotentis Dei cunctaque regentis, ego Stephanus, quondam miles de Brugeria, divini muneris respectu ad sanctę conversationis habitum veniens, dedi simulque reliqui eidem omnipotenti Deo et Cluniacensi cęnobio quod est consecratum in honore beatissimorum apostolorum Petri et Pauli, cui etiam donnus Hugo abbas preesse pariter ac prodesse dinoscitur, quoddam jus meum quod habebam in manso de Cerniaco. Quem scilicet mansum donnus Wigo quondam miles de Germola jam dicto monasterio tradiderat possidendum, sed postea medietas ejus prava cupiditate in cujusdam militis jus devenit, de cujus alia medietate quę habetur in custodia decani villę quę dicitur Arpagiacus, tertia pars nihilominus mihi jure parentali obvenerat, quam uti prefatus sum, ex integro tradidi supradicti cęnobii fratribus, in manu simul atque presentia donni Hugonis abbatis, laudantibus fratribus meis, Achardo scilicet atque Artaldo, cum servitio duorum denariorum quotannis et quicquid ibi possederam, in vineis videlicet, silvis, pratis etiam et pascuariis. S. Stephani, qui hoc donum fecit. S. Achardi atque Artaldi, fratrum ejus.