Charta qua Walo dat monasterio Cluniacensi res suas in villa Igiaco.
Notum sit omnibus, tam presentibus quam futuris, quod ego Walo, scelerum meorum inmanitatem formidans, atque Deo omnipotenti satisfacere desiderans, monachicum habitum in loco Cluniacensi sumpsi, et pro anime mee parentorumque meorum remedio quicquid in villa que dicitur Igiacus hereditario jure possidebam seu possidere debebam, tam in vineis quam in agris cultis atque incultis, seu consuetudinarium usum in nemoribus circumquaque sitis, sive reditus et servicia rusticorum terram nostram tenentium, postremo quicquid ibi habebam supradicto loco contuli, cum laude filiorum meorum atque uxoris mee et aliorum propinquorum meorum, et sine omni calumpnia in perpetuum habendum transfundi. Donavi etiam feudum quod Archimbaldus miles a me in eadem villa habebat, cum laude ipsius, ut servitium quod mihi faciebat loco Cluniacensi faceret. Si quis, improbo ausu, hanc donationem temerare presumpserit, utpote sacrilegus divine majestatis reus et contemptor apostolorum Petri et Pauli cum reprobis igne inextinguibili perpetualiter cruciabitur. S. Lebaldi, S. Bernardi, S. Berardi, et S. Wicardi, S. Lezelini, filiorum meorum. S. Teuze, uxoris mee. S. Freeburgis, S. Pontie, filiarum mearum.
(Au dos:) Karta Walonis de terris quas dedit in villa Igiaco Sancto Petro.