Cum inter homines de aliqua magna re fit conventio, aut vuerpitio, sive commutatio, memorię posterorum intimandum est stilo, quo maneat ratum et inconvulsum in perpetuo. Unde nos monachi Clunienses dignum duximus literis tradere donum et vuerpitionem quam fecit nobis Bernardus de Capella et uxor ejus ac filii. Donavit namque nobis et vuerpivit omnem calumpniam quam habebat contra nos de terris et servis et ancillis, quę tenemus, et alii per nos, et forfacturam quam nos et nostri feceramus illi. Similiter et nos illi perdonavimus quicquid querelę contra eum habebamus; et ita pacem et concordiam inter nos fecimus. Et ut ista concordia inter nos omni tempore firma permaneat, fecimus scamium, quod mutuatio dicitur, de terris nostris. Dedimus quippe ei terram quam sanctus Odilo concesserat illi in villa Cassinola, ut eam teneat jure in alodum, et cum ista terram de Monte Dernon in beneficio. Escamium vero quod fecit et donavit nobis, terra est de Monte Gobone, a fonte Manum usque ad Taxoneriam, cujus terminus rectus est ex una parte, ex altera vero parte a predicta Taxoneria est terminus usque ad viam publicam quę vocatur Fracta, per finem cunbę quę Vallis appellatur, a parte meridiana usque ad terram Sancti Petri via publica, a mane terra Odelrici. Dedit namque nobis ante portam Sancti Jangulfi unam contaminam terminatam terra Sancti Petri a duabus partibus, a tertia rivo currente, a sero terra Sancti Nazarii; et ex altera parte ipsius villę, unum campum habentem a mane viam publicam, a meridie terra Agdoardi, a sero terra Bernardi, a septentrione terra francorum. Alium etiam campum in Craio dedit nobis, a mane herentem vię publicę, a meridie et a septentrione terra Dalmatii, a sero Bernardi et Stephani Fabri. Signum Bernardi, qui fieri et firmare rogavit. S. Emmę, uxoris ejus, et Bernardi, filii ejus. S. Milonis, filii ejus. S. Jozeranni, filii ejus. S. Inmari, filii ejus. S. Attalę, filię ejus. S. Beatricis, filię ejus. Actum in Monte Cercisio, in presentia donni Tetbaldi comitis, et donni Sigaldi prioris, et Oddonis, Wilelmi, Stephani, monachorum.