Charta qua Osbertus notum facit se alodium suum in villa Genebrensi monasterio Cluniacensi dedisse.
Quisquis desiderat heres effici illius terræ de qua dicit Psalmista: «Credo videre bona Domini in terra viventium», hanc terram quam pedibus calcamus et vermes hereditant non dubitet dare pro salute animæ suæ Deo pauperibusque Christi pro amore factis, ut una cum eis gaudiis supernis perfrui valeant, dicente Domino: «Venite, benedicti, et cetera.» Quapropter notum sit cunctis fidelibus, quod ego Osbertus dono Deo et sanctis ejus apostolis Petro et Paulo, ad locum Cluniacum, quicquid alodi habeo in villa Genebrensi. Est autem via publica super ipsam terram, et decurrens rivulus subtus. Hanc vero cartam firmaverunt fratres ejus Abo et Walterius, et Durannus presbiter, et Wido rusticus et Constabulus. Facta est hæc carta anno M. LIIII Dominicę incarnationis, regnante Henrico rege Francorum.