Charta qua Rainaldus de Castro Luciaco dat monasterio Cluniacensi ecclesiam Sanctæ Mariæ de Luciaco, Burgum Novum et villam Tamponati.
In nomine Dei Patris, et Filii, et Spiritus Sancti. Notum sit cunctis sanctę Dei ęcclesię catholicę fidelibus, presentibus et futuris, quod ego Rainaldus de Castro Luciaco dono Domino Deo et sanctis apostolis ejus Petro et Paulo, et loco Cluniaci, ubi domnus Ugo abbas magis videtur prodesse quam preesse, et fratribus ibidem Deo servientibus presentibus et futuris, concedo ego jam supradictus miles abbati Cluniacensi, et fratribus sibi subjectis, dono videlicet et laudo, pro remedio animę meę et omnium parentum meorum, omne quod habeo in ęcclesia Sanctę Marię de Luciaco et quicquid ad ipsam pertinet ęcclesiam, totum ab integro. Item dono eidem loco burgum qui vocatur Novus et omne quodcumque ad ipsum burgum pertinet. Dono etiam villam quę vocatur Tamponat cum omnibus ad se pertinentibus. Hanc autem nostram donationem quam feci pro remedio animę meę de ecclesia Sanctę Marię, et de Burgo Novo, et de villa Tamponati, feci cum consensu et laudatione Gaufredi de Sinemuro, senioris mei, et cum laudatione Wigonis de Varenas et Ugonis de Moneta et Gaufredis Rubri consobrini mei, nullum de eis contradicente, sed magis laudante et confirmante. S. Rainaldi, qui hoc donum fecit et testes firmare rogavit. S. Aganonis, episcopi Eduensis, qui hoc donum laudavit et testes firmare mandavit. S. Walteri decani. S. Guidonis archidiaconi, Ugonis thesaurarii, Nergaudi precentoris, Hugonis archidiaconi, Siguini prepositi, Duranni capellani. S. Raynerii archipresbiteri et totius conventus Sancti Nazarii. Si quis autem hanc donationem infringere voluerit, (quod absit!) nisi ad emendationem venerit, in primis iram omnipotentis Dei incurrat et sanctorum apostolorum Petri et
Pauli et aliorum omnium sanctorum, nisi ad satisfactionem venerit. Omnes vero qui observatores hujus nostrę donationis extiterint, veniant super eum omnes benedictiones veteris et novi Testamenti. Amen. Amen. Fiat. Fiat.