Epistola Odalrici, Remensis canonici, Hugoni, abbati Cluniacensi, qua ei mandat se domum suam ante templum Sancti Dyonisii Remensis sitam monachis Cluniacensibus ad hospites recipiendos dedisse.
H[ugoni], Dei provisione ęcclesię Cluniacensis abbati, universęque sibi subditę congregationi, O[dalricus], suę servus sanctitatis, ad felicitatem pervenire sempiternę quietis. Cum in urbe Remorum suas habere mansiones pleraque cęnobia considerassem, in quibus fratres qui in eisdem cęnobiis Deo militant, undecunque redirent, hospitarentur et requiescerent, bono Dei zelo ductus, spem in vestris ponens orationibus, ego Odalricus, Remensis ęcclesię canonicus ac sacerdos, beato Petro cęlorum clavigero et ęcclesię Cluniacensi nullam in urbe predicta mansionem habenti, domum meam quę in terra habetur Sancti Dyonisii, ante templum ipsius sancti, ad censum IIII
or denariorum, post decessum meum tradere deliberavi; eo videlicet tenore quod predicti monasterii fratres, nec eam venundari nec expendere presumant, sed in ea semper diversis e partibus redeuntes et hospitentur et requiescant, et eam sibi mansum indominicatum habeant: tali primiter servata conditione, ut cum obitus mei hora supervenerit, a primo die usque ad XXX
mum tam missis quam vigiliis animam meam Deo commendent, et meum quotannis proinde anniversarium facere nullatenus omittant. Bene valeat sanctitas vestra in Christo.