Omnibus ab æterno et in ævum commune mortalibus, summa et ineffabili Dei omnipotentis providentia, liberi arbitrii copiam fore collatam, utriusque tam veteris quam novi Testamenti multiplex pagina effabiliter intonat. Horum ego, quamvis indignus, Dei servorum servus, Unaldus, Bruliensium vicecomes cognominatus, me ipsum et substantiam universam quam abere videor, cum consilio et voluntate genitricis meę domne Adaleidis et fratris mei Hugonis vicecomitis, aliorumque plurimorum nobilium virorum, pro salute et remedio animę genitoris mei Rotgerii et avunculi mei Saxetonis, Aginnensis æcclesię quondam decani, et omnis progeniei nostræ, et simul cunctorum fidelium vivorum et defunctorum, precipue autem pro refrigerio animę meę, cedo regi regum Deo omnipotenti sanctissimisque et summis apostolis ejus Petro et Paulo, ac celeberrimo loco Cluniaco, abbatique venerando domno Hugoni, simulque omnibus sibi in eodem officio succedentibus, et fratribus in ipso loco sub regulari tenore degentibus, tam futuris quam presentibus, æcclesiam mei juris in honore sancti Martini pontificis consecratam, Alairacum cognominatam, in pago Aginnensi, supra fluvium Garonnę et Gercis sitam, totam ab integro, excepta quinta decimę parte que est cujusdam nostri consanguinei. Dono etiam et alias ecclesias, scilicet Sancti Saturnini in eodem loco constructam, Sancti Petri de Casals, Sancti Vincentii de Avezag, absque tertia parte, Sancti Vincentii de Preissag, Sancte Marię de Manzovilla, Sancti Gervasii de Cirsol, Sanctę Marię et Sancti Saturnini æcclesiam in Siriniaco, silvam unam et ęcclesiam in honore Sanctę Marię in eadem silva, alodium de Montguasco; has, inquam, ecclesias cum universis apendiciis suis, quę nunc in possessione earum haberi videntur, vel Deo auxiliante quicquid in terris, vineis, et silvis, aquis, molendinis et pascuis, cultis et incultis, cum omnibus jam adeptis et adhuc adapiscendis, quemadmodum et in hac eadem denotatione subscripta habere videntur. Non solum autem hęc, sed et cetera quęcumque a coquumque, cunctis diebus, vita comite, augere potero vel adjungere abbati et fratribus Moysiacencis monasterii, jussu et imperio domni Hugonis Cluniensium reverendi abbatis, consilio et voluntate fratrum omnium Cluniensis capituli, quandiu locus ipse cum hibidem Deo servientibus in subjectione et ordinatione jam dicti loci Cluniaci perstiterit et permanserit, tenere, regere et possidere, censeo ac dispono, tali tenore et ordine quatenus per singulos annos jure perpetuo annuatim censum, id est decem solidos probate ac legitimę monetę senioribus Cluniaco persolvant; reliqua vero quę inde habere potuerint in Dei servitio ac propriis usibus perhenniter ipsi habeant et possideant. De cetero ergo, quia sancta et salubris est cogitatio pro defunctis exorare, ut a peccatis solvantur, memorandum ac memorię comendandum dignum duxi in memoriale perpetuum humiliter implorans, supradictis in locis, Cluniaco scilicet et Moysiaco, sub regulari scemate degentes, omni anno in perpetuum, pro animabus genitoris ac genitricis meę, necnon et avunculi mei jam dicti Saxetonis, anniversarium diem memoriter agere. Hujus siquidem cessionis atque donationis descriptio facta est anno incarnationis Domini nostri Jesu Christi MLXII, sede residente in apostolica divę memorię Alexandro papa, Franchorum regni regente monarchiam serenissimo rege Philippo per omnia. Si quis autem, quod absit, vel alterius vel nostræ generositatis maligno spiritu agitatus, hanc nostræ cessionis ælemosinam inquietare ausus fuerit, aut aliquo modo infectam reddere presumpserit, æterno omnipotentis Dei judicio omniumque sanctorum, et nunc et in evum se sentiat ac cognoscat dampnandum, insuper et apostolicę sedi presidentis auctoritate et potestate, omniumque catholicę ecclesię episcoporum anathematizandum et excommunicandum, et quousque resipiscat ac satisfacere studeat, plusquam ethnicum et publicanum liminibus sanctę ecclesię procul pellendum; nomina autem eorum qui hanc cessionis meę cartam ita tenendam, possidendam, habendamquę firmaverunt hæc sunt: in primis venerabilis Hugo, Cluniensium abbas, in cujus presentia hęc sunt ordinata atque sub ejus manibus firmata. Post ipsum quoque memorande memorię domnus Durannus, abba simul et episcopus, cujus consilio hęc agenda disposuimus. Post hos, ego ipse Hunaldus propriis manibus et viva voce firmavi. Adalert genitrix mea firmavit. Hugo vicecomes, frater meus, firmavit. Willelmus Arnaldi et filius ejus Petrus firmaverunt. Garsia Arnal, cognomento Guailard, firmavit. Willelmus Siguini et frater ejus firmaverunt. Rodlannus et filii ejus firmaverunt. Willelmus Garsia et filii ejus, aliiquę quamplures firmaverunt.