Satis omnibus ut opinor notum est, qualiter ego Gaubertus, abba nominatus olim a Vilelmo, comite Tolosano, emptione magni pretii XXX scilicet milia solidorum, abbatiam Moysiacensis cęnobii comparaverim. Nunc vero et deinceps omnes posteros meos ad quoscumque quorum in manibus hæc guerpitionis mee adnotatio advenerit, scire volo, quod ego postea seniori meo Pontio et filio ejus Wilelmo totam predictam dederim abbatiam post finem meum. Hac de causa, pro amore videlicet Dei et pro salute animę meæ seu pro stabilitate ac restauratione ejusdem abbatiæ, ut non post deinceps, post discessum meum, ipse meus senior Pontius, neque filius ejus Wilelmus, nec ullus successorum eorum comitum, licentiam habeat aut vendere, aut dare, aut commendare prefatam abbatiam Sancti Petri Moysiacensis cœnobii cuiquam clericorum vel laicorum, nec etiam ulli meorum parentum, ita ad possidendum ut hactenus ego et predecessores mei male et seculariter visi sumus possidere, sed perpetuo Wilelmus, filius Poncii, et filii ejus post eum, et omnis posteritas genealogiæ ejus tenendo possideant et juste ac viriliter regant et abbati regulari a fratribus ejusdem congregationis, voluntate et consensu abbatis et totius congregationis Cluniacensis monasterii regulariter electo regendam tradant. Sed et si de Wilelmo, Pontii filio, legales non apparuerint filii, fratribus suis Raimundo et Ugoni, filiis Pontii similiter, per conventionem suprascriptam ipsis et filiis eorum, qui legales ex eis prodierunt, habituram trado. Quod et si casu evenerit, ut omnium istorum comitum palatinorum abolendo progenies evanescat, illi tamen qui sorte post eos arcem ac regimen Tolosani comitatus acceperit et qui secundum ordinem et secundum seculi dignitatem predictam abbatiam possidere voluerit, similiter habendam cedo, salva in omnibus fide abbatum futurorum Cluniensium. Hoc autem ut omnibus, tam presentibus scilicet ac futuris, pateat, volo quod predicti mei seniores ac palatini comites, Poncius et ejus filius Wilelmus ante hanc meę donationis guirpitionem mihi dextras et propriorum insuper corporum fidem dederint numquam se daturos cuiquam hominum viventium Sancti Petri Moysiacensis monasterii abbatiam, nisi abbati regulari regulariter, ut dictum est, a fratribus ejusdem cœnobii, jussu et voluntate abbatis et congregationis electo. Et ut hoc meę dimissionis annotatio semper firma stabilisque permaneat, in manibus predictorum meorum seniorum, comitum Pontii et filii ejus Wilelmi, coram nobilibus, propriis meis manibus subnixa stipulatione firmavi. Hujus autem rei testium vocabula subter habentur inserta. Ego Gaubertus abba nominatus rem dictam reddidi stabilitate firma. Gaubertus de Lauragensi castro firmavit. Bernardus Petri de eodem castro firmavit. Bernardus Rainonis de Wandalorum castro firmavit. Raimundus Emelii firmavit. Facta donatio hæc in manu Wilelmi comitis Tolosani, anno ab incarnatione Domini millesimo LXIII, regnante rege Philippo, data V idus junii.