CCE: cartae cluniacenses electronicae
Database of the Charters of the abbey of Cluny (802-1300)

BB 3403     View  [Back]
«Constitutio Achardi, episcopi Cabilonensis, quam fecit de capella quæ dicitur a la Carmeda, cum consensu clericorum.»
Anno ab incarnatione Domini millesimo sexagesimo IIII, indictione II, feria VI, luna XX, III nonas decembris, dedicatio hujus loci æcclesiæ in honore beatæ Mariæ sanctorumque martyrum ac piissimi et dulcissimi patris beati Odilonis, quam egit piæ memoriæ domnus Achardus Cabilonensis episcopus cum venerabili cętu nobilium clericorum sibi adherentium. Est autem hæc capella sita in suburbio Cabilonis, in parrochia quæ vocatur Cidanis. Locus autem in quo ipsa capella sedet dicitur a la Carmeda, cincta undique silva densissima. Quam passim incisam, aliqui homines undecumque adventantes habitacula sibi commoda prepararunt in circuitu predicti oratorii. Constituit itaque jam dictus episcopus cum consensu clericorum, ut omnes convenæ qui de aliis locis ibi advenerint causa habitandi vel quoquomodo demorandi, ut ipsi capellæ prebeant certam offerendam, et baptisterium, quando etiam defuncti fuerint debitam in ipso cimiterio ab ipso presule sacrato excipiant sepulturam, sine alicujus personę contradictione. Quod si quis huic constitutioni impie repugnare nisus fuerit, quod causatur non vendicet, sed sub vinculo anathematis permaneat, usque dum congrue resipiscat. Istud decretum factum et laudatum est a domno Achardo pontifice et a clericis subnotatis. Domnus Roclenus prepositus et decanus laudavit. Rodulfus archidiaconus, Constantinus capellanus, Ademarus canonicus, Bertrannus grammaticus, laudaverunt. Et non solum isti presentes, sed et alii absentes laudaverunt. Volumus etiam nosse cunctos rationabilitatem sectantes, quod Tethbaldus, comes Cabilonensis, requirebat in silva quę vocatur Prestaria capturam cervorum, aprorum, caprearum cęterorumve animalium silvestrium, et ob hoc prohibebat culturam agrorum in ipsa silva fieri. Acceptis autem a domno Hugone abbate centum solidis, werpivit quod injuste requirebat in ipsa silva non solum semel set etiam bis.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung