In nomine Patris omnipotentis. Ego Emma, cum filiis meis Bernardo, Milone, Josceranno, Enmaro, dono Domino Deo et sanctis apostolis ejus Petro et Paulo quendam mansum ad locum qui vocatur Cluniacus, pro viri mei defuncti absolutione seu requie, ut Deus omnipotens, per intercessionem summorum apostolorum Petri et Pauli et omnium sanctorum, liberet animam ejus de inferni voragine, et a ministris tartareis clementer eripiat et in sinu Habraæ eam perducat. Ipse denique mansus est situs in Cabilonensi pago, in villa quę vocatur Tavellis; ab oriente terminat via publica, ab occidente via quę ducit ad Sanctum Jamgulfum, undique vię per circuitum. Ipsum vero mansum ego et filii mei, sicut superius dictum est, donamus totum ex integro Domino Deo et sanctis apostolis ejus Petro et Paulo ad locum supradictum, ut ibidem Deo servientes teneant, habeant, possideant jure perpetuo. Si quis vero aut ex heredibus nostris, aut de successoribus, aliquam calumpniam inferre temptaverit, in judicio publico quod habere poterit persolvat usque ad unum nummum. Si pertinax extiterit, cum Dathan et Abiron descendat in infernum, et cum Caypha et Juda traditore Domini maneat in ęternum supplicium. Quod vero repetit vendicare non valeat; carta hęc firma et stabilis permaneat.