Omnipotentis Dei misericordiam prestolantes, metuentesque auditum malum, atque desiderantes «Euge» bonum, ad honorem et rever[en]tiam nominis sanctæ Trinitatis, ego Arnallus fidelisque mea conjunx Arsindis, propter remedium animæ karissimi filii nostri Guilelmi, nostrarum, nostrorumque parentum, obtimum et insigne donum ab ipso nobis concessum, Deo Patri et Filio Spirituique sancto, ac Sancto Petro Cluniacensi domnoque abbati Hugoni, et omnibus monachis predicti loci, donamus nos predicti Arnallus et Arsindis æcclesiam Sancti Petri quę est fundata infra castellum Aggeri, cum omnibus suis pertinentiis, ipsumque castellum Aggeri cum omnibus adjacentiis suis, cum omnibus castellis, villis, vicis, munitionibusque ac æcclesiis, mansis, terris, planis, montibus, montanis, vallibus, silvis, garricis, quadris, turribus, aquis, aquarum viæ (sic) ductibus reductibusque earum, tam rusticum quam et urbanum, cum exitibus et regressibus earum, cum militibus, cavallariis, hominibus, mancipiis universis utriusque sexus, infra terminos castelli predicti degentibus, sicut nos predicti donatores ibi habemus ac habuimus et habere debemus, et sicut scriptum est in cartis illius æcclesiæ Aggeri, quas scribere rogavimus, et cum omnibus quę æcclesia predicta habet et habere debet, necnon, adjuvante Deo, adquisitura est, et de nostro jure tradimus et in potestate Sancti Petri et cenobii predicti domnique abbatis et monachorum ejus mittimus et transfundimus, ea tenore ut fiat ibi monasterium regulare, et ut perhenniter sit alodium Sancti Petri, abbatum monachorumque Cluniacensium, in tali vero ratione, ut castrum dictum Aggerem et castella sibi pertinentia, et alia castra æcclesiæ jam dictæ quæ nos predicti sibi dedimus, teneamus nos predicti donatores de manu abbatis Cluniacensis et de manu prioris Aggerensis quem ibi miserit vel constituerit abbas Cluniacensis, et castellani qui tenuerint illa castra pro nobis sint homines abbatis Cluniacensis et sint fideles Sancti Petri et monachorum ejus de rebus illorum, salva nostra fidelitate et posteritate nostra, et ita fiant omnia sicut scribere fecimus in cartis Sancti Petri vel adhuc cum consilio abbatis predicti scribere faciemus, salva securitate Romanę æcclesiæ. Post obitum vero nostrum, posteritas nostra cui nos predicti donatores diviserimus per scripturam testamenti, teneat similiter castra predicta de manibus abbatis Cluniacensis et prioris Aggerensis, et sint sui homines comandi, et jurent eis fidelitatem et securitatem predictorum castrorum et abbas predicti loci Cluniacensis habeat hęc prescripta de potestate Sancti Petri et domni papæ Romani, et reddat per quinquennium X solidos aureos, sicut continent privilegia a pontificibus Romanis Aggerensi æcclesiæ concessa. Sunt hæc ergo quę prediximus in Ispaniam, in finibus christianitatis quę, preveniente comitanteque ac subsequente virtute Domini Dei nostri, nos inde ejecimus Sarracenos, cum maxima ex utraque parte sanguinis effusione, et quia sunt perpulchra sanctioribus et precellentissimis locis jungere quatinus pro amore fili nostri dilecti ibi dormienti. Hanc autem cartulam donationis et investiture tante rei anno M LXVI incarnationis Dominicę, septimo kal. decenbris, regnante rege Philippo, scribere fecimus, ac domno abbati Cluniacensi per karissimum monachum, fratrem Henricum, misimus voluntarie et potentialiter firmam et corroboratam; laudamus hanc in æternum esse permanentem. Cum autem, dante Deo, venerimus ante faciem domni abbatis Cluniacensis, omnes Aggerensis æcclesiæ cartas sibi dabimus, insuper ampliorem testamentariam innovabimus. Si quis vero contra hanc donationem venerit vel inquietaverit, quod quesierit non valeat vendicare, sed in triplici Sancto Petro conponat, et confusione plenus, nisi legaliter emendaverit, anathematis vinculo in æternum mactetur, et nisi resipuerit, cum Juda traditore in infernum in perpetuo dampnetur, et non liceat de his omnibus predictis alicui viventi de communia monachorum æcclesiæ Aggerensis abstrahere neque aliter transmutare vel aliis hominibus subjugare, nisi sicut est prefinitum, aut cum predicto abbate nos predicti donatores constituendo sanctiemus. Sig. Arnalli Minoris (sic) et uxoris ejus Arsindis, qui hanc cartulam donationis et investiture magne rei scribere jussimus et firmavimus, et testes firmare rogavimus. S. Gaucerandi. S. Drogonis. S. Isarni monachi. S. Pontii, qui inerat cum Henrico. Henricus monachus scripsit jussus, die annoque prenotato, cum duabus rasuris et XI suprascriptionibus.