In nomine Dei summi Patris, et Filii et Spiritus Sancti. Ego Willelmus, et uxor mea Aimeruz, et filii mei Arnaldus, Bernardus, Willelmus, Raimundus, Geraldus, pro remissione peccatorum nostrorum et pro anima Garsię filii nostri et omnium parentum nostrorum precedentium et succedentium, atque pro adipiscenda gloria sempiterna, donamus Domino Deo et sanctis apostolis ejus et Petro et Paulo ad cenobium Cluniacum, cui domnus abbas Hugo preesse videtur, aliquid hereditatis nostrę, scilicet ęcclesiam beatissime virginis ac martiris Genivere, cum omnibus quę nunc possidet et adhuc adquiret. Hoc autem dono factum est ab incarnatione Domini anno millesimo LXVII, indictione quinta, epacta tercia, mense maio, XVI kal. jun., presentibus Garsia de Godbes, Aremon de Sanctels, Auger de Secmont, Wilelmo de Savinago et fratribus ejus, omnibusque illic adstantibus. Quapropter rogamus per omnipotentem Deum omnes presentes, absentes et succedentes, ut hoc donum collaudent, integrum et illibatum custodiant, quatinus ob hoc gratiam Dei adquirant societatemque Cluniacensium fratrum, quam pro hoc dono suscepimus, participentur hic et in evum. Si quis autem hoc calumpniari vel temerare presumpserit, quod appetit, prohibente Deo, perficere non possit, insuper iram Dei omnipotentis incurrat, et cum Datan et Abiron in gehenne incendio intereat. Hoc ergo rogamus, ut hoc donum confirmet apostolica sedes, ut si quis hoc destruere voluerit, auctoritate beati Petri et Romani pontificis anatematizetur donec resipiscat. Huic autem supradictę ęcclesię quam retulimus subiciuntur hę quarum nomina ita habentur: in primis beatissime Dei genitricis Marię de Aman, deinde Sancti Clementis; has subsequitur ęcclesia Beati Sulpicii Adirani cum omni hereditate qualiter ostenduntur termini, alia veneratur in honore prothomartiris Stephani Flaviacensis; in eadem vero villa construitur alia in laude supradicte Dei genitricis Marię, cognomento Villę Longę; his autem adscribimus ęcclesiam beatissimi confessoris Christi Martini Ulbiionis; huic ergo provincię afinis est alia que vulgo vocatur Porcortur, videlicet Sancti Saturnini dimidia pars que adjungitur ceteris. Inter has recte memoramus ęcclesiam perpetuę virginis Marię, quam supra meminimus, quę habetur in villa Ginilac. Si quispiam vero fuerit cui hoc displicuerit et ab hoc dono aliquid defraudaverit, sicut fluit cera a facię ignis, sic pereat a conspectu Domini. Hęc autem carta scripta est nono kal. septembri, in claustro ejusdem loci, regente apostolicam sedem domno Alexandro papa atque regnante Philippo rege, insuper regnante Domino nostro Jesu Christo, qui nobis omnibus misereatur. Amen. S. Hugonis vicecomitis. S. Rodlandi et filiorum ejus. S. Guillelmi Emardi et filiorum ejus. S. Odoni abbatis. S. Arduini canonici. S. Eicii Bernardi. S. Siwini filii, abbatis ejusdem loci. S. Arnaldi canonici. S. Arnaldi secretarii.