Charta qua Bernardus et frater ejus Gaufredus dant monasterio Cluniacensi, pro anima uterini eorum Walterii, gladio interfecti, mansum in villa Poisole.
Quia hic civitatem manentem non habemus, sed futuram inquirimus, ideo nos duo fratres Bernardus et Gaufredus donamus Deo et sanctis apostolis ejus Petro et Paulo, ad locum Cluniacum, pro remedio uterini nostri Walterii, gladio interfecti, et animarum nostrarum, unum mansum cum omnibus appenditiis suis, situm in villa Poisole, eo tenore ut nobis viam universę carnis ingredientibus seniores predicti loci corpora nostra sepeliant, animasque nostras orationum suffragio Deo commendent. Facta est autem hęc donatio anno
Dominicę incarnationis M. sexagesimo VII, indictione V, Philippo regnum Francorum gubernante, donno Hugone abbate Cluniaco presidente.