CCE: cartae cluniacenses electronicae
Database of the Charters of the abbey of Cluny (802-1300)

BB 3449     View  [Back]
Præceptum Henrici quarti imperatoris quo confirmat donationem capellæ de Rimesingun ab Hessone monasterio Cluniacensi factam.
In nomine sancte et individue Trinitatis. Henricus, divina favente clementia, rex. Quoniam regie majestati nostre convenit justis petitionibus assensum prebere, maxime autem his ubi religionis intuitu ducimur, ut votorum fidelium participes efficiamur, donum cujusdam religiosi viri, nomine Hessonis, laudamus, concedimus, et nostra potestate regia confirmamus. Est autem donum prefati Hessonis quod donavit ad monasterium Cluniacense, quod est constructum in honore beatorum apostolorum Petri et Pauli, ecclesiam unam quam edificavit ipse idem Hesso in proprietate sua, in loco qui dicitur Rimesingun, et omne patrimonium sive predium suum quod ad eandem ex toto dicaverat ecclesiam. Fecit autem hoc bonus ille Hesso, dum Cluniacensi monasterio presideret venerabilis pater et abbas Hugo, hac videlicet ratione, ut monachi de Cluniaco ad prefatam ecclesiam Rimesingun sitam transmissi et collocati, de rebus inibi pertinentibus vivant. Et fiat hujus doni oblatio cunctarum Christi fidelium animarum propitiatio sive redemptio. Si quis autem fuerit ita improbus aut temerarius, ut tam pie devotionis datum Jesu Christo in sanctis ejus dicatum convellere temptet aut qualibet molestia calumniari, et e statu legitimo infringere, sit dux, sit comes, sit quelibet omnino talis potestas, sit liber aut servus, si prefatum nostre concessionis regie statutum in presenti dono irritum facere adtemptet, L auri libras coactus persolvat fisco regali. Et ut hoc nostre majestatis regale decretum, tam presentium quam futurorum noticie sit commendatum, kartam hanc inde conscribi jussimus, quam propria manu roboratam sigilli nostri impressione signavimus. Signum domni Henrici quarti regis invictissimi (Monogramme). Adalbero cancellarius, vice Sigefridi archicancellarii recognovi. Data Wormatie, VI kalendas augusti, anno Dominice incarnationis millesimo LXXIIo, indictione X, anno autem ordinationis domni Heinrici quarti regis XVII, regni vero XVI.
(Au dos:) Preceptum Henrici quarti imperatoris, de Rimesingyonis capella, cum alodio et patrimonio Hessonis boni viri.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung