CCE: cartae cluniacenses electronicae
Database of the Charters of the abbey of Cluny (802-1300)

BB 3480     View  [Back]
Charta qua Rogerius comes et uxor ejus Sicardis dant monasterio Cluniacensi castrum dictum Lurdad et villas cum ecclesiis in valle Savartensi.
In nomine sanctę et individuę Trinitatis. Ego Rogerius comes et uxor mea Sicardis, cognoscentes peccatorum nostrorum enormitatem simulque futuri seculi pęnas non ignorantes, sollicite et anxie, preveniente gratia illius qui neminem perire, sed omnes vult salvos fieri, cogitare, et perpendere cępimus si quomodo de nostrorum remissione facinorum quantulamcumque spei fiduciam aliquatenus invenire vel comprehendere divina pietate valeremus. Itaque, quoniam, attestante Scriptura, divitias viri animę ejus redemptionem posse fieri cognovimus, teste Veritate quę dicit: «Facite vobis amicos de facultatibus vestris, ut cum defeceritis, recipiant vos in ęterna tabernacula»; quapropter ipsi Deo omnipotenti cui omnia sunt et a quo cuncta habemus, aliqua de concessis nobis ab eo rebus fideliter offerimus, quatinus ipse qui non propter se, sed propter nos potius hęc misericorditer consuluit, nobis in futuro judicio partem cum electis secum tribuat perhenniter regnaturis. Et quoniam post beatam Mariam neminem nos apud illum melius adjuvare posse credimus, quam beatum apostolorum principem Petrum, sive etiam vas electionis sanctissimum coapostolum ejus Paulum, quibus potestatem ligandi et solvendi in cęlo et in terra contraditam novimus, ipsas res quas offerimus ipsi, sicut suprascriptum est, Deo omnipotenti et jam dictis apostolis Petro et Paulo ad locum Cluniacum jure perpetuo possidenda sollempniter contradimus. Sunt autem ęedem res in comitatu Tolosano, in valle Savartensi, quas etiam nominatim sicut sunt per loca singula necessario in hac donationis nostrę carta exprimendas censuimus. Igitur in primis, sicut jam diximus, donamus Deo et sanctis apostolis ejus Petro et Paulo castrum Lurdad, cum castellanis suis ad locum Cluniacum, cui domnus abbas Hugo preest, tam ipsi quam successoribus ejus omnibus, quicquid habemus vel nos vel alii aliqui per nostram manum, infra terminos istos, a Stampa videlicet usque Martemara, sive a Tava usque Bel, necnon et ab Alvers usque Surzen sive etiam usque Stampa, exceptis ecclesiis Sancti Volusiani de Burbre et de Unac... ... cuncta quę infra adjacentias istas, sicut diximus, vel nos habemus, vel alii per nos tenent, scilicet castrum Lurdad, cum castellanis suis, villamque de Arsaz, cum ęcclesia quę in eadem villa in honore sancti Saturnini necnon et sanctorum martirum Juliani et Basilissę estat consecrata; sed et villam Apinum simili modo donamus, et villam Succunacum et villam de Casaz, et villam de Vernaus, et villam de Podio cum ęcclesia sua, necnon et villam Garanun, simili modo cum ęcclesia sua, et villam de Lusinac, et villam de Unac, et villam de Vestiac et villam de Savenac et villam de Cauzun, et villam de Burbre, et villam de Werz, et villam de Alvers, et apud Fredelezum duos casales quos ego Rogerius comes comparavi, unum de Johanne Bruniolo et alterum de Atmantio. Ista omnia et cętera quę his addendo daturi sumus, proprietatis jure in perpetuum possidenda et tenenda donamus Deo omnipotenti, sicut superius commemoravimus, et sanctę Marię sanctisque apostolis ejus Petro et Paulo ad locum Cluniacum, rogantes ut ex eisdem rebus domnus Hugo abbas cum nostro adjutorio et consilio in villa Garanun monasterium incipiat in honore prelibatorum sanctorum, aditis etiam beatis apostolis Symone et Juda, Andrea, Johanne, Jacobo, Philippo, Bartholomeo, Matheo, Thoma et altero Jacobo, atque Mathia, quatinus post Deum ab istis omnibus locus ipse tueatur, custodiatur, muniatur et gubernetur. Et sicut accepta potestate in cęlo et in terra ligandi et solvendi constituti sunt ad judicandum orbem, super sedes duodecim, ita omnibus qui eidem loco consilio et adjutorio fuerint, cum eis qui a dextris statuentur peroptabilem vocem: «Venite, benedicti patris mei, percipite regnum quod vobis paratum est ab origine mundi, Domino largiente», promant, et malefactoribus et calumpniatoribus, nisi penitendo et emendando satisfecerint, exsecrabilem e contrario sententiam: «Ite, maledicti, in ignem ęternum, qui paratus est diabolo et angelis ejus», terribiliter intorqueant. De his quoque omnibus privilegium a domno papa fieri approbamus et volumus. Facta est autem hęc descriptionis carta hortatu et consilio domni Isarni, Tolosani pontificis, die dominica, luna IIII, in conversione beati Pauli, anno ab incarnatione Domini millesimo LXX. IIII., indictione XII, tempore domni papę Gregorii septimi anno II papatus ejus, regnante Philippo rege Francorum. Signum Rogerii comitis. Signum Sicardis comitissę. Signum Rogerii abbatis. S. Bernardi. S. Arnaldi Vuilelmi. S. Bernardi Atonis. S. Atonis Arnaldi. S. Willelmi Ratfredi. S. Unaldi, abbatis Mosiacensis. Peracta jam hęc carta, addidimus, sicut supradiximus, molendinum unum in Avezaco et Silvam Tortam subteriorem et territorium inter Silvam Tortam et Fredelez, quod vocant super Agrerium, totum et integrum sine ulla reservatione, et medietatem de alodio de Cadasurz, et unum casalem in Asinaco ... Donamus insuper pignora quę habemus de comite Willelmo Tolosano pro septingentis solidis de denariis Tolosanis, de moneta decena, in ipso alodo quod vocatur Sonacus, quod est in pago Tolosano, et pignora similiter quę ego Sicardis comitissa habeo in alodio de Criun, id est decem uncias auri fini ad pondus.
(Au dos:) Rogeri[i] comitis, de castello Lurdad, in archiepiscopatu Tholosano.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung