Divina pietas et misericordia multiplex ad consulendum, mortalibus dans formam ædificandi æterna et mansura de bonis temporalibus: «Facite,» inquit, «vobis amicos de Mammona iniquitatis, ut cum defeceritis, recipiant vos in eterna tabernacula.» Quapropter ego Willelmus, dux Aquitanorum et comes Pictavorum, hæc attendens et Scripturæ dicentis: «Divitię viri redemptio animæ illius» recolens, ob enormitatem meorum facinorum, deliberavi et statui Pictavis in alodio meo construere monasterium ad servicium et honorem Domini Dei omnipotentis, et beatę Mariæ semper virginis, et beati Johannis evangelistę, sanctique Andreæ, atque apostolorum Symonis et Judæ, omniumque sanctorum, quatinus isti eorumdem meorum facinorum et patris ac matris, necnon cunctę meę parentelæ interventores et precatores existant, ut quod nostris non valemus meritis, eorum assequamur patrociniis; quodque, ut stabilius et firmius per succedentia tempora maneat, sub ordinatione et gubernatione domni Hugonis, Cluniacensis abbatis, cunctorumque sui successorum pono ac trado, et dominio eorum per omnia subicio. Statuo autem ipsum monasterium liberum et francum et fundum in quo sedet, et trado ei villam ultra aquam sibi contiguam et stagnum sive piscariam cum molendinis et villam Agriciacum et burgum Sancti Saturnini cum tampnatoribus et villam Jamnuas et revestituram de Mostariolo, sicut determinata est, et revestituram de Ussello, sicut determinata est, et revestituram de Bouet, sicut determinata est, et villam de Bennaco, sicut eam habeo, cum casamentis militum, et quartam partem de Olorun, excepta turre et castro. Trado etiam ei Artigiastrimers. Concedo etiam, laudo et auctorizo quicquid mei milites vel homines, in honore vel de honore meo dederint prædicto loco sive monasterio. Si quis vero regum, comitum, episcoporum, sacerdotum, clericorum, judicum ac secularium personarum, hanc nostræ traditionis et confirmationis cartam quoquo modo calumpniatus fuerit vel perturbaverit, nisi penituerit et emendando satisfecerit, iram omnipotentis Dei omniumque sanctorum incurrat, atque in æterno examine districtę ultioni cum Datan et Abiron et Juda traditore Domini subjaceat. Cunctis autem eidem loco justa servantibus, sit pax Domini nostri Jesu Christi, quatinus et hic fructum bonę, actionis percipiant, et apud districtum judicem præmia ęternæ pacis inveniant. Facta est quoque hæc carta descriptionis sive firmationis V kalendas februarii, anno ab incarnatione Domini M^o LXX^o VII^o, indictione XV^a, regnante rege Francorum Philippo; pontificatum tenente domno Gregorio septimo papa, anno autem pontificatus ejus quarto. S. Wilelmi comitis, qui hoc donum fecit. S. Oddonis, abbatis Sancti Johannis. S. Ugonis de Lisigniaco. S. Borelli. S. Girberti de Sancto Johanne.